04 أغسطس 2011

3 رمضان،، شربات لكل حبايبي!!

...................

الشهر،، بيطيـــر كده ليه؟؟
والله بيجري بجد،،،،
تالت يوم راح،، والرابع كمان خلاص أهو :(

اللهم اشهد،، هذه ليست شماتة
ولكنها فرحة المظلوم بنصر الله،، ألا إن نصر الله قريب!
ده بقى شوربات المخلوع ،،
لكل حبايب فتافيت
:)))


ولو خلص اعملكم تاني،، ده يوم المــُنى
لما أشوف مبارك وولاده و7 من كلابه في القفص
ويااااااااااه،، لما قال رئيس المحكمة:
المتهم،، محمد حسني السيد مبارك
ورد هو وقال،، أفنـــدم!!،،،، سبحــــانه
يعز من يشاء ويذل من يشـــاء
وافرحوا بالنصر الله،، ومتخلوش حاجة تعكنن عليكم
محدش عارف بكره فيه إيه،، صحيح استفزونا بالضحك وهم طالعين!
بس ربنا قادر يرد كيدهم إن شاء الله
أملنا في الله كبيـــر!

وبغض النظر عن صوباع أهله اللي قرفني بيه
وهو في مناخيره طول الجلسة،، بس كنت مبسوطة بجد
ولم أشعر بأي أسى أو شفقة،، ولو لفثــوة واحدة

أقوى جملتين أتقالوا في المرافعة
من هيئة الدفاع المدني،،
(إذا كان الوطن تزين بدماء الشهداء...
فاليوم الوطن يتزين بهذه المحاكمة!)

(من الذي سرق وقتل واستباح،، إنه هذا السفاح!)

وأكتر جملة غبية قالها،، دفاع الشاعر والعدلي
(المتهمون ليس لديهم ثمة إتهام وهم بروئاء!)
وطبعا نسي يقول الروئاء ده باللبن ولا باللحمة المفرومة؟!

أوقح طلب من هيئة دفاع المتهمين
(تحويل التهمة من القتل العمد إلى ضرب أفضى إلى موت!!)
وده طبعا على اساس إن
المسدسات كانت بترش ماية

والبنادق بتضرب خرز،، والقنابل كانت بومب العيد!!

أكتر حاجة كوميدية في الجلسة
(طلب أحد المدعين بتحليل DNA عشان يأكد أن ده مش مبارك
وبيقول إن مبارك مات من سنة 2004!!!)
طيب لو حقيقي،، يبقى مين اللي باسته سوزان في كأس الأمم 2006؟؟؟

(لما القاضي سأل الديب،، أنت عندك طلبات؟
رد عليه وقاله،، لا بس صحابي عندهم،،!
القاضي قاله تاني،، يا أستاذ أنت عندك طلبات؟؟؟
رد وقاله،، لا أنا لا،، بس صحابي عندهم!!
القاضي،، أنا بقولك انت شخصيا عندك طلبات؟؟!
رد وقال،، أنا لا خالص،، بس صحابي عندهم!!!!)


فصدق الله العلي العظيم،، عندما قال:
(فَالْيَوْمَ نُنَجِّيكَ بِبَدَنِكَ لِتَكُونَ لِمَنْ خَلْفَكَ ءَايَةً وَإِنَّ كَثِيرًا مِنَ النَّاسِ عَنْ ءَايَاتِنَا لَغَافِلُونَ)

أعتقد إن البوست مش محتاج أضافة
عشان نثاب عليه،، إن شاء الله
هو عبرة وعظة لمن يتعظ،، أوعى تتغر بملكك وبعزك
قادر ربنا في لحظة ينتزعه منك،، ويذل كل متكبر ظالم
ربنــــا يكملهـــــا بالستـــر!


هناك 8 تعليقات:

  1. لو انتهت محاكمته عند هذه اللحظة لرضيت

    محاكمة رئيس مخلوع لجمهورية مصر العربية

    انها لحظة تاريخية لاول مرة اجس بانجازات الثورة

    نفس الكبر و نفس الغرور و نفس الصلف

    تحياتى

    ردحذف
  2. مش عارف ليه حاسسهم

    جبلاااات و لا كأنهم فى حاجة

    ردحذف
  3. أنا بجد فخورة بالمحاكمة دى و عندى أمل أنها تكمل بجد
    و فعلا مصعبش عليا و لو للحظة و حركة السرير دى بجد هايفة أوووى يعنى !!
    و جايب أصلا شوية مهرجين مش محاميين !! ..
    ربنا يكملها على خير ان شاء الله و نفرح فى الاخر كده

    ردحذف
  4. ابراهيم رزق

    والله نفس اللي قولته
    كل كوم وجمال وعلاء والعدلي وهم بيضحكوا
    وهم طالعين وبيسلموا على الجيش!!!

    أهو مبارك باع طنطاوي،، وهانتفرج للصبح!

    ردحذف
  5. Ramy

    هو لو فيه حاجة اكتر من جبلات فهم دول
    كـــــلااااااااااااااب،،
    اللهم اني صايمة!

    ردحذف
  6. Radwa Ashraf

    هي حاجة تفرح،، والتريخ سجل
    بقى عندنا رئيس سابق سوابق وحاجة زي الفل
    بس الديب ده عايز غارة تاخده عشان نرتاح من سمه
    خايفة يطلع براءة :((،، تبقى وكسة

    اللذيذ انهم بدأوا يقعوا في بعض
    وده في صالح الشعب،، على ما أعتقد يعني!

    ردحذف
  7. هههههههههههه :)
    أيوة فعلا صحابه عندهم :)
    و الله يا رحاب الواحد من زمان ماقعدش يلف على المدونات كدة :)
    و كل الناس مبسوطة بالمحاكمة ..
    و بروئاء دي كمان .. الراجل من الربكة نسي الجمع الصحيح للغة ..!!
    بس برضه انا عاوزة محاميي الحق العام و الشهداء يكونوا اقوى من كدة ..
    أتمنى يعني :)
    و رمضان مبارك عليكي .. و مبروك التدوينات اللي فازت يا ستي :)

    ردحذف
  8. الأخت الفاضلة حفظك الله ورعاك ،،،
    أنا عربي أعتز بعروبتي ،،، مسلم أعتز بإسلامي ،،،
    ولدت وأنا أسمع جدتي تدعو الله على الذين باعوا أوطاننا وسلموا مقدساتنا لأعداء الدين ،،،

    لطالما وصفت جدتي بطولات أفراد الجيش المصري في فلسطين ( طبعاً من صغار الضباط والجنود ) ومن المتطوعين الذين قدموا إلى الأرض المقدسة لا يرجون سوى جنة عرضها السموات والأرض ،،،

    ذهبت إلى قبر والدي رحمه الله حيث توفي قبل ثمانية أشهر وأخبرته بخبر ثورتكم المجيدة وكم تمنيت لو أن الله أطال عمره سبحانه حتى يشفي قلبه من هذا الطاغية الذي باع الأمة وهتك أستارها وأسلمها مكتوفة لعدوها ،،،

    أمي كانت تدعو لكم وهي تبكي وكانت تخشى عليكم من مذبحة رهيبة من قبل هذا الظالم ؛ فلما بشرتها بتنحيه الحمدلله سجدت شكراً لله وهي تبكي بدموع الفرح ،،، ثم عملت لي رز بلبن (رز بحليب ) حسب لهجتنا الفلسطينية وكانت هذه حلاوتي لأنني أول من قرأ لهال الخبر العاجل على الجزيرة ،،،

    كم كانت فرحة أبي بالحذاء العراقي وهو يحلق فوق رأس طاغية العالم بوش ،،، ولو طال عمر أبي لكانت فرحته بنصر الله لكم لا توصف ،،،

    اعتصموا بحبل الله جميعاً ولا تفرقو ،،،، والله متم نوره ولو كره الكافرون ،،،

    (( حلوه الرؤاء )) أصلها عندنا رؤاء بالعدس (رقاق بالعدس ) هههههههه ،،،

    (ويشف صدور قوم مؤمنين )) صدق الله العظيم ،،،

    ردحذف

خلل براحتك من غير انتظار .. فتافيت أصلاً بتحب الخيار