27 أبريل 2011

الحرية للمصريين المعتقلين بقطر!!


من 4 أيام،، أختفى 15 مصري في الدولة الشكيكة قطر
من ضمن هؤلاء المختفين،،
أنس حسن و سامحي مصطفى مؤسسي شبكة رصد
وطبعا تبين أن ده مش إختفــــاء
ده إعتقـــال من أمن قطرأو سوريا للمصريين
المهم دلوقتي بقى....
إن مافيش أي موقف رسمي من قطر يقول هم فين؟!

نقطة بقى ومن أول السطر عشان نفهم..


إمبارح الفجر،، الخبر ده

رصد | قطر | عاجل |
اختفاء 15 مواطن مصرى فى دولة قطر منذ 3 أيام
من بينهم اثنان من مؤسسى شبكة رصد وهم
"أنس حسن" و "سامحى مصطفى"
و أهالى المفقودين لا يعلمون عنهم أى شىء حتى الآن
ولا يوجد تفسير رسمى من دولة قطر حيال هذا الحادث
RNN # ,02:00 AM

أنس وسامحي، هم
مصريين مقيمين في قطر،،!!
مؤسسي شبكة رصد وأعضاء سابقين فيها
وبعدين عملوا تغطية قويـــة جـــدا
لثورة سوريا، المعتمة إعلامياً
وبسبب فيديوهاتهم وتغطيتهم المحترفة
بشار أتفضح فضيحة المطاهر يوم خروجه مخلوع
بدأت تيجي تهديدات لسامحي من الأمن السوري،،
وبعدها تـــم ،،
إختطاف
أو إختفاء
أو إعتقال
أنس حسن وسامحي مصطفى،،
و 13 مصري غيرهم!!



أنا مش فاهمة حاجة؟؟
بأي حق الشكيكة قطر تعمل كده؟؟
ولا نقول إن الأمن السوري،، دخل قطر وخطفهم
وهل أمن قطر بالضعف ده كله؟؟،
إن أمن سوريا يدخل ويخطف 15 مصري
ويخرج بيهم عادي جدا مثلا؟؟

ولا ده تنسيق بين الأختين الشكيكتين سوريا وقطر؟؟
أنس وسامحي وغيرهم ،، عملوا إيه؟؟
فضحوا بشارالأسد،،،؟!
طيب مهو أصلا ريحته جايبة لحد أمريكا

ولا قطر خايفة تتفضح هي كمان،،
والتعتيم اللي فيها يتكشف ؟؟
ملعون أبو بشار دلوقتي على أبو قطر،،
فين أنس وسامحي؟؟؟

فين دور الخارجية بتاعتنا؟؟؟
15 مصري من 4 أيام مافيش أي خبر عنهم!!
ده عادي يمر مرور الكرام؟

أنا معرفش سامحي معرفة شخصية، لكن أعرف أنس
ولو الـ14 مصري الباقين من نفس عينة أنس
يبقى إحنا خسرنا 15 راجل بجد
ثقافة وتدين وأخلاق وعلم ووطنية وحياد

الحرية للمصريين في قطر
الحرية لأمؤسسي شبكة رصد
الحرية لصديقي أنس
:(

هناك 20 تعليقًا:

  1. يارب يكتب بسلامتهم

    ويارب ينتقم من الخونه

    ردحذف
  2. هي من امتى تعتبر قطر شكيكة؟
    قطر مش بتبص غير لمصلحتها طول عمرها
    وعايزة تبقى الدولة الرائدة للشرق الاوسط بفلوسها او بقناة الجزيرة وهي اللي تحدد السياسات
    قدمت مرشح لجامعة الدول العربية وهتشتريله شوية اصوات حلوين والغباء بتاعنا بدل مات نحط واحد قصاده قوي ومحبوب حطينا الفقي
    السؤال الصح اشمعنا اختفوا دلوقت بعد ما الدكتور عصام شرف قال ان مصر والسعودية هم الدولتين اللي يقدروا يحشدوا الدول العربية ويقودوا المنطقة
    اشمعنا دلوقت والدكتور عصام رايح هناك قطر
    اشمعنا دلوقت وفي مرشح قطري قصاد مرشح مصري لامين جامعة الدول العربية
    قطر بتحاول الضغط على مصر علشان تعرف قوتها وتحسس مصر ان زمن الريادة كان زمان ومهما كان مصر ليها تاريخ فلقطر المستقبل لكن هيهات قطر هتفضل صغيرة زي ما كانت طول عمرها والفلوس ممكن تشتري اصوات لكن متشتريش احترام
    نيجي بقى لانس وسامحي يمكن قليلين يعرفوا ان كان في انقلاب عسكري من شهرين في قطر تم افشاله ومحاكمة حوالي 30 ضابط
    طبعا في ظل التعتيم الاعلامي وان مفيش قناة عربية محترمة هتنشر او تذيع محدش بيسمع
    الخوف بقى من الشبكات اللي زي رصد انها تنشر حاجات من دي
    وكمان رصد الوحيدة اللي اتكلمت عن مظاهرات القطيف في ظل التعتيم الاعلامي السعودي
    بالتالي اصبحت رصد منافسة قوية للاعلام القطري وكمان بتنشر اللي قطر عايزة تعتم عليه
    حكاية امن سوري واتفاق قطري سوري مش داخلة دماغي
    لان قطر تابعة لامريكا بالتالي بتكره سوريا جدا ونفسها تشمت فيها ويوم فرحها اللي بيحصل لبشار
    على العموم ربنا يرجعهم بالسلامة وان شاء الله الدكتور نبيل العربي والدكتور عصام شرف هيحلوها ويخرجوهم
    تحياتي واسف للاطالة

    ردحذف
  3. انا زعلان منك عشان بتقولي دولة شقيقة
    ياسيدتي جميع دول الخيج بلا استثناء لا يمتون للعرب بصلة دول مجموعة تيوس مش اكتر صدقيني انا اتعاملت معاهم وعارف هما بيفكروا في ايه مع اني متاكد انهم معندهمش عقل من الاصل
    انشالله ربنا سبحانه وتعالي يطمنا علي اخواتنا ويرجعوا بالسلامة

    ردحذف
  4. الموضوع كبير ... !
    لازم يتبصلوا من أكتر من زاوية ... أولاً الدول العربية لا هيه شقيقة ولا دياولوا وعايزين للمصريين حارقة وغارقة ... الا من رحم ربى ... عارفة اطيب العرب مين ... السودانيين ... !

    المهم الدول العربية الموجودة فى شبه الجزيرة العربية ... تاريخها كله أسود بلاك ... اللى قتل اخوه واللى نفى ابوه ... واللى اتحالف مع الانجليز ... واللى باع فلسطين ... الخ

    اقرى الكويت وأخواتها ده كتاب ممكن تعمليله داوون لووود
    هتعرفى حاجات كتير ... !

    ثورة 25 يناير ترتعد منها فرائص حكام عرب الجزيرة ... و يخشون انتقال العدوى الى بلادهم ... انهم يكرهون المصريين ... أقسم بالله يكرهون المصريين ... لا أحرض على الكراهية أو العداوة ... ولكن لأن المصرى - بفضل من الله - من أنبه العقول على وجه الأرض ، وأجلد النفوس ، و آبى الطباع ، فالعرب - أغلب العرب - تملأهم المرارة ، وتشتعل فى قلوبهم نيران الغل من المصرى ، لن اطيل عليكى ، كما اننى غالباً ما أشعر بالصداع اذا تحدثت عن العرب .

    أستحلفك بالله ان تقرئى قصيدة بلقيس للرائع نزار قبانى ، ولو لم يكتب من الشعر غيرها لكفته .

    تحياتى

    ردحذف
  5. مش لاقي حاجة أقولها
    لكن موقف قطر معروف من زمان
    احنا اللي كنا بنكدب نفسنا , أنا لست مع الرأي اللي بيقول أن قطر ملهاش دور في الموضوع
    بالعكس
    دورها أساسي جدا , أساسي لدرجة أن دور سوريا في موضوع الإعتقال ده لم يزد عن مكالمة تليفونية.

    ردحذف
  6. مش بس الحريه

    القصاص ممن سجنهم

    ردحذف
  7. يارب يرجعوا بالسلامه
    ويكتب للشعب المصرى الامان والسلام
    تحياتى

    ردحذف
  8. ربنا يسلم المصريين في كل مكان

    الله المستعان

    تحياتي

    ردحذف
  9. أزال المؤلف هذا التعليق.

    ردحذف
  10. بستبعد أن تتورط دولة قطر الشقيقه في اعتقالهم وقناة الجزيره تقوم بكشف كل شئ عن ما يدور في سوريا
    سيدتي قناة الجزيره القطريه كانت خير عون للثوره المصريه وهذا لا ينكره الا جاحد
    من لا يشكر الناس لا يشكر الله
    ___
    ان شاء الله يعودوا سالمين الي وطنهم

    ردحذف
  11. من وقت ما حصلت الثوره عندنا وانا مستغربه موقف قطر فى كل اللى بيحصل
    وارد يكون ده من زمان واحنا اللى ماخدناش بالنا الا دلوقتى
    ربنا يرجعهم بالسلامه ويحميهم

    ردحذف
  12. الحمد لله تم الإفراج عن أنس
    وسامحي قالوا انهم هايفرجوا عنه لكن لسه التأكيد ما وصلش... القبض عليهم ومن على لسان انس.. كان بسبب بعض فلول أمن دولة..!!

    المهم ربنا يفك أسر الباقي إن شاء الله

    ردحذف
  13. rack-yourminds

    أنا أتعلمت أني ما استبعدش اي حاجة خالص
    وبعدين انا مجابتش سيرة الجزيرة نهائي في كلامي.. وبالمناسبة ابقى خد بالك من الفيديوهات اللي الجزيرة بتعرضها عن سوريا.. هتلاقي عليها علامة بالازرق مكتوب عليها ش ا م ... دي شبكة شام اللي جه لسامحي تهديد بسببها.. مافيش اي اعلامين جوه سوريا حضرتك !!.. وكل الفيديوهات اللي معتمدة عليها الجزيرة وغيرها.. من شبكة شام.. للتوضيح فقط!

    وكمان انا عارفة كويس اوي لاني مش (جاحدة) ان الجزيرة كانت لها دور عظيم في ثورة مصر... طبعا وكانت تغطيتها رائعة جدا.. بغض النظر عن اسباب التغطية.. ! ولها جزيل الشكر واتصلت بها اكثر من مرة ايام الثورة وقولت بالحرف أقبل أقدام قبل رؤوس كل من قام ببث ما يحدث بمصر فلولا الجزيرة لأبيد كل من في التحرير بدم بارد..!

    وانا بفصل بين الجزيرة كقناة .. اخبارية مسيسة
    وبين دولة قطر الشكيكة... اللي بتعمل كل اللي في وسعها عشان تصغر صورة مصر.. وتعيش دورها!
    وبين الشعب القطري العربي الشقيق!

    اصلي لو ربطت بين الجزيرة ودولة قطر.. كده الجزيرة هاتفقد مصداقيتها عندي لانها مثلا تركز مع غاز مصر اللي (كان) بيتصدر لاسرائيل وتغض الطرف عن غاز قطر اللي برضو رايح لود العم سام!!!

    المهم متشكرة على دعوتك لهم
    والحمد لله انس خرج.. وسامحي في الطريق.. بالمناسبة انس بيشكر جدا في اكل السجن وقال الامن كان بيتعامل معاه باحترام :)

    ردحذف
  14. يجب تصعيد الموضوع لرئيس الوزراء المفروض اننا في عهد علو للمصريين و حمايتهم و لا يجب ان تتخلي البلد عن ابناءها مهما حدث

    في الماضي دائما ما نري تقاعس الحكومه عن مساندة ابناءها و لا تتدخل حتي تشتري خاطر الدول الاخري ولو ضحت بنا جميعا
    ارجو ان يتبدل العهد للافضل
    تحياتي

    ردحذف
  15. يا ترى فيه جديد عن هؤلاء الأبناء يا فتفوتي؟

    ردحذف
  16. ثقافة الهزيمة .. العتبة الخضراء‏

    و تقول الحكومة المصرية التعيسة أنها تسعى لبناء أربع محطات نووية بحلول عام 2025، على أن يبدأ تشغيل أولاها في 2019 ، وأن يضيف البرنامج النووي الجديد ما يصل إلى 4000 ميجاوات !!! علما بأن تكاليف بناء 4 مفاعلات نووية حوالى 20 مليار دولار.

    و نشرت جريدة المصرى اليوم فى 20 سبتمبر 2010 تصريح د.حسن يونس وزير الكهرباء و الطاقة جاء فيه سيتم إيفاد 67 مهندساً مصريا إلى كل من الولايات المتحدة، وروسيا، وفرنسا، وكوريا الجنوبية، للتدريب على التكنولوجيا النووية. وبالفعل هذا مفيد لأرسال الأصدقاء و المعارف فى رحلة مدفوعة الأجر على حساب الشعب المصرى الفقير. ..تكلفة مفاعل نووى جديد يبلغ 5.52 مليار إيرو ، و 300 من مراوح توليد طاقة الرياح تنتج ما يعادل مفاعل نووى و تتكلف 900 مليون إيرو فقط!!!

    باقى المقال ضمن مقالات ثقافة الهزيمة بالرابط التالى www.ouregypt.us

    ردحذف
  17. ربنا ان شاء الله يفرجها ربنا كريم ولكل ظالم نهايه تقبلى مرورى

    ردحذف
  18. يا جماعة الخير أنا عملت كومنت من 6 أيام
    قولت إنهم الحمد لله تم الإفراج عنهم

    :
    :

    فتافيت يقول...

    الحمد لله تم الإفراج عن أنس
    وسامحي قالوا انهم هايفرجوا عنه لكن لسه التأكيد ما وصلش... القبض عليهم ومن على لسان انس.. كان بسبب بعض فلول أمن دولة..!!

    المهم ربنا يفك أسر الباقي إن شاء الله
    30 أبريل, 2011 03:02 ص

    ردحذف
  19. ياااااااااارب تفرجها على مصر واهلها
    http://www.4exvision.com

    ردحذف
  20. معك حق طبعا
    فين دور الخارجية بتاعتنا
    وفين المصريين المختطفيين دى فعلا جريمة

    http://www.un4web.com

    ردحذف

خلل براحتك من غير انتظار .. فتافيت أصلاً بتحب الخيار