03 أكتوبر 2010

بيحبوك يا ريس.. و مش شغل سيما



في صيف 2006.. كنت في المعمورة
المهم في الوقت ده أتعرض عليا أشتغل في السيما
آيااااااااااه أيام الشباب بقى.. أي والله بجد
وكان مخرج عامل كليب على دريم.. وكان مصر (يعني مصمم)
إنه يعرفني على منتج بيدورعلى وجه جديد بمواصفات معينة
(طبعا قياسية ^_*).. عشان دور تاني في فيلم جامد
هو عارف إني أنفع جدي للدور...
ويحاول يقنعني وأنا لا يونكن أبداً
وصحابي يقنعوني وأنا على كلمة واحدة
ما خدوش يا بابا.. ما خدوش يا بابا
يا بنتي دور تاني في أول فيلم.. تاني فيلم تاخد بطولة مطلقة
وأنا ولا حياة لمن تنادي أصلا.. سيمــــا!!
يالهوي.. أشتغل في السيما.. يا نهار كسوف
وده لأني خلقة ربنا مابحبش الشهرة أحب أعيش براحتي
ده حتى من كام شهر...
لما عملت حلقة في ثقافية كافيه

كفيت على الخبر ماجور وسكوتم بوكتم
أصلا ما بحبش الكاميرا

أم هنـــــد بقى.. اليومين دول
حسيت بخيبة أمل راكبة جمل
وعضيت صوابعيني من الندم
يارتني كنت سمعت كلامهم
واشتغلت في السيمــا

بس تفيد بإيه يا ندم.. فات الميعاد


كان زماني دلوقتي .. في لقاء الريس مع الفنانين
وأكيــد كنت هاقوله كلام كتير أوي.. غير مطالب الفنانين
بتاعة العلاج.. والنقابة.. وعيد الفن.. قال ناقصين أعياد
كنت هاقول له.. وأنا قاعدة معاه في القصر الجمهوري
طبعا بقى.. مهو أنا شغالة في السيمـــا:

حال شعبك يا ريس..
بقى لا يسر إيران ولا حتى إسرائيل

تخيل بقى فخامتك..

ومع ذلك والله يا ريس الشعب

اللي هو الشعب
.. الشعب المصري بيحبك

عارف فخامتك مين الشعب..؟؟؟

مش الوزراء ولا الفنانين ولا حتى بتوع الحزب

الشعب اللي هو العمال الفقيرة.. معدومي الدخل

أصل محدودي أتلغت
من يجي كام سنة كده

لما كيلو العدس بقى بـ12 جنيه!

اللي زي العمال اللي عمالة تقع وتموت
في مجاري الصرف الصحي
في الغربية
آشي أتخنق وآشي فقدوه وآشي.....

آه والله العظيم بيحبوك وبيدعولك


عارف فخامتك..
مع إني من الفنانين اللي بياخدوا في الدور الواحد
مبلغ جنبه 6 أصفار
.. بس عشت زمان
أيام ما كنت من الشعب وسط ناس كان مرتبها في الشهر
متكون من رقمين.. فيهم صفر واحد.!


والله العظيم يا ريس..
أنا شوفت بعين راجل بيعيط
جنب فرن أفرنجي عشان مافيش في جيبه
نص جنيه
يجيب قرصة ياكلها.. تسد جوعه وتقويه
آه وعزة جلال الله

أنا عارفة فخامتك..
إني كفنانة سفيرة لمصر قصاد العالم كله
بس والله ياريس..
لو يعني الحكومة خدت بالها من الشباب
اللي زي الفل اللي في مصر..
هتلاقي مليون سفير لمصر بعلمه وتفوقه
لا بفستانه ولا بعنيه الزرقا.. ولا حتى بالسيلكون
زي زويل ويعقوب ومحفوظ...
الناس اللي مشرفة مصر.. بره وجوه
والله حتى فخامتك خليهم بس يجربوا.. !

طيب بلاش ياخدوا بالهم من الشباب..
طيب العجايز يا ريس..!!!
ده حتى الكبـــر عبـــر..

عارف فخامتك....
زمان لما كنت من الشعب
ومش فنانة وبشتغل في السيما

كان فيه قصاد مكتب وزارة الخارجية

في المدينة اللي كنت عايشة فيها
ست عجوزة ..
رجلها أرفع من رغيف الفينو أبو ربع جنيه
بتنام في الشارع.. قصاد المكتب
والله في عز أمشير..!
عنيها من كتر البكا قفلت وبقت خط.. أتعمت
وحوليها تجاعيد عمري ما شوفتها في حياتي..
طيب ياخدوا بالهم من اللي زيها..!

طيب مش مهم دول كمان فخامتك..
مهم كده كده أصلا خلاص
عمرهم الافتراضي انتهى!


فخامتك الشعب جاع..
عارف فخامتك..

الشعب دلوقتي السلطة عنده بقيت
من الرفاهيات.. يعني يادوب بيشتري
كيلو طماطم لطبيخ كام يوم

كل الأكل بتاع الشعب بقى صايص..
عشان مفهوش طماطم!!

أصل يا ريس..
الطماطم بقت بعشرة جنيه.. اه والله
مش هاقول بقى لفخامتك على ..
اللحمة والفراخ والسمك

أصل الشعب أصلا نسي شكلهم..!
مش بس طعمهم.!!!!


معلش ياريس....
عارفة إني زمايلي الفنانين محتاجين يتكلموا
عن مشاكلهم الضخمة الإنسانية..
اللي منغصة عليهم حياتهم يا عيني!

بس أصلي عارفة إن ديه زيارة
مش هاتتكرر في عمري تاني...

زمان فخامتك..
لما كنت من الشعب وقبل ما أفتح لأخويا
مستشفى استثماري.. يمص فيها دم اللي ماصين دم الشعب
كان بياخد وهو دكتور قد الدنيا في امتياز
230 جنيه في الشهر

طيب دول والله العظيم ياريس..
حتى ما كملوا مواصلاته في أسبوع
واحد في الكلية..!!

زمان برضو فخامتك..
دخلت على موقع من بتوع التوظيف أيام ماكنت
من الشعب برضو.. ومافيش شغل بقى وبطالة وكده
لحد ما ماما دعتلي واشتغلت في السيما
لاقيت مهندسين اتصالات.. بتتعاقد على شغل
مع واحد خليجي عشان يبعوا.. تخيل فخامتك إيه؟؟
جرابات وسمعات موبايلات في السعودية..!!

والله ياريس...
جالي أيامها أكتئاب أسبوع..!
وأنا قلبي بيتقطع عليهم وعلى أهلهم
اللي دفعوا دم قلوبــهم

عشان يبقى عندهم الباشمهندس والباشمهندسة!

أنا طولت على فخامتك..سامحني
بس والله أنا حتى ماقولتش حاجة

أصلا الشعب خلاص
من بعد ربنا عز وجل مابقاش قصاده
غيرك يا ريس..

ومش هافكر فخامتك تاني..
والله الناس الطيبة ديه بتحبك بجد
مش عشان اسمهم ما يسقطش في تغير وزاري
ولا عشان راحوا أنجلترا يتعالجوا على نفقة الدولة

ولا عشان هاتعملهم عيد فن..

بس عشان حاجة وحدة
فخامتك الريس.. والله بيحبوك يا ريس

(¯`v´¯)
`·.¸.·´

¸.·´¸.·´¨) ¸.·*¨)

(¸.·´ (¸.·´ .·´¸¸.·´¯`·



أشوف بقى موقف التايم ترافل
أكيد هلاقي توك توك المنادي فيه بيقول
نفر واحد صيف 2006 المعمورة
نفر واحد هنا.. خلينا نطلع بقى
أروح ألحق أركبه بسرعة
وأشتغل في السيما

::





هناك 17 تعليقًا:

  1. للاسف الشديد
    محدش واكلها فى مصر
    غير
    الحراميه اللى اسمهم مستشمرين
    والفانين
    ولعيبه الكوره
    وبس
    باقى الشعب مطحونين يعنى
    لو الواحد ملهوش حد
    يبقى
    خلاص هيشتغل زبال مش هيبيع جرابات واكسسوارات يارب نطولها

    خلى بالك
    مفيش حد من اللى قابل الريس من اول طلعت زكريا لغايه لقاء المثقفين والفانين اتكلم عن حال المواطن العادى خالص

    كله بتكلم فى مشاكله رغم انهم زى ما بتقولى ب6 وال7ميلون فى العمل الواحد
    الناس اللى تحت محدش حاسس بهم كلهم كدابين
    حتى فى تمثيلهم
    محدش عنده الجراه انه
    يتكلم
    والريس يقول الشعب عمل فى نفسه كده هو اللى خلى الطماطم ب10جنيه
    والتانيه تقول الشعب المصرى عنده رفاهيه مطلقه لازم يعمل سلطه يعنى بلاش سلطه وخليه فى الصلصه
    والله موااجع واكبر موجوعه منهم انك ليه ما اشتغلتيش
    انتى كنتى هتبقى منلونيره ولا شوفنا حرف من اللى كتبتيه دول
    ولا حتى عرفناكى
    هو كده
    كلنا كده
    ملناش غير كده

    ردحذف
  2. زعلانة جدا
    كنتي على الثقافية كافية ومتقوليش
    لأ زعلانة زعلانة
    وادي اخر دعوة الأم
    ربنا مخلكيش تعملي الكليب ولا الفيلم وتبقي بعد الشر منة شلبي :)

    ردحذف
  3. السلام عليكم
    ايه هنقول غير الله يرعانا ويحفظنا
    يمهل ولا يهمل.
    ممكن تشرفيني بمدوني الجديده هكون سعيده
    رشا
    سلامي

    ردحذف
  4. كان زمانك يا فتفوتي كل يومين في لبنان بتعملي نيولوك وبقيتي سفيرة للاممز ( جمع أمة ) و طالعه تعملي وتقولي كلام في البتنجان و احنا نقول خسارة كانت كويسه ..هههههههههههههه

    الحمدلله إن ربنا عافاكي .بس عجبني يوم الفن داه يا فتفوته المدارس حتاخده اجازة والا اهل الفنز بس؟

    ردحذف
  5. و بعد ما قالي تشتغلي في السيما صحيتي من النوم
    هعهع

    ردحذف
  6. المصيبة ان الريس يقولك ايه ده هو احنا لسه عندنا شعب لحد دلوقتي
    لك الله يامصر
    اسلوبك في الكتابة رائع
    تحياتي الخالصة

    ردحذف
  7. الله على جمال اسلوبك
    اضحكنى بالرغم ان ما فى البوست يبكى

    عارفه المصيبه الكبيره ايه انك لو قولتى للريس الكلام دا هيقولك انه مندهش اصل رئيس جمهوريه الاندهاش

    ردحذف
  8. مصر فى مهب الريح

    فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.

    1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
    2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
    3- مشكلة تعمير مصر والتى يعيش سكانها على 4% من مساحتها.
    4 – العدالة الاجتماعية .. وأطفال الشوارع والذين يملكون كل شىء .
    5 – ضرورة الاتحاد مع السودان لتوفير الغذاء وحماية الأمن القومى المصرى.
    6 – رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.

    لمزيد من التفاصيل أذهب إلى مقالات ثقافة الهزيمة بالرابط التالى www.ouregypt.us

    ردحذف
  9. انتي عارفة ان مقالتك دي مقال ادانة له امام الله عز و جل
    هههههههههههههه
    اه والله لأن دي شهادة منك ومني و مننا كلنا انه مخدش باله من رعيته
    في رمضان الماضي كنت بشتري انا وصديقي ما لذ و طاب من طعام عشان نتسحر في المسجد و احنا راجعين شفت طفلين نايمين على رصيف الترام في محطة الرمل لو تعرفيها و اكيد انتي عارفة الرطوبة في اسكندرية عاملة ازاي خصوصا لما تكوني قريبة من البحر
    اللي طلع عليا بقيت اقول " والله حايتحاسب و الله حايتحسب على دول " و فضلت ارددهاكتير
    مبنفعش بعد كده نحبه لكن برضه مش بنكره لأن الاسلام معلمنيش الكراهية

    ردحذف
  10. اه بجد بنحبك يا ريس بالرغم من كل شئ بالرغم من ان الناس جالها اكتئاب وكل يوم حاله انتحار بسبب لقمه العيش اقربها انهارده شاب ذى الفل من كتر القهر والتعب وقف قدام شريط السكه الحديد واخد القطر بالاحضان كل ده علشان بيحبك يا ريس
    ضحى بحياته علشانك يا ريس

    فما اعظم هذا الحب الى يموت

    ارحمنا يارب

    ردحذف
  11. يااااه تصدقي انا بردو مجيتش هنا من زماااان

    كنتي هاتقولي كل الكلام ده ؟

    كان زماننا بنترحم عليكي :D

    ربنا يبعد عنا الغلاء والوباء ، اللهم آمين

    صحيح عايز اشوف الحلقة بتاعة ثقافية كافية ياريت لو تحطي اللينك بتاع الحلقة

    ردحذف
  12. السلام عليكم ورحمة الله... لفتني كلامك وفعلاً جميل جداً جداً جداً...لكن يمينك ان الناس بتحب الريس سامحيني أنا معترضة عليه ...إزاي نحب شخص مش سائل فينا ولا حاسس بينا ويوم لما ربنا كرمه وحب يفتكر حد من الشعب المصري ...أفتكر الفنانين أصحاب المرتبات التي لا تقل عن مبلغ زي ماانت قلتي ب3 أصفار... أقرأي عن عمر بن الخطاب رضي الله عنه وكيف كان يحمل هم دابة يعني "حمار أو جاموسة أو بقرة أو جمل أو حتى قطة"في دولته لو عثرت"أتكعبلت" في طريق مش متسوي ربنا هيسأله عليها...وشوفي سؤال الريس على الغلابة وأنت تعرفي أن الشعب فعلاً مش بيحبه ع العموم...كلامك جميل جداً وفي الصميم جزاك الله خيراً

    ردحذف
  13. اه يا فتفوته تدوينه توجع القلب الموجوع
    ربنا يخرجنا من هذه القرية الظالم أهلها

    ردحذف
  14. انا مش بحبه حبوه انتوا لو حدكو واقولك هشتكنا وبشتكنا ياريس ده انت رئيس والنعمه كويس هههههههههه
    تحياتى ليكى

    ردحذف
  15. فتافيت السكر يا سكر..
    واضح انك بقالك فعلا ربع قرن بتجمعي اللي ها تقوليه..
    بس ليه ضيعتي فرصة السيما بس...؟
    كان زمانك فعلا قابلتي الريس وناديتي بمطالب الفنانين الاساسية وهي المساواة بالبلد الشقيق (لبنان) والمطالبة بحق (قرض تجميل) لكل فنان :)

    ردحذف
  16. اولا جميله جدا وكلام مؤثر وفي الصميم وبالنسبه لحب الريس على الاقل مش بنكرهه اما بالنسبه للمواطن اللي اطحن في ساقية الحياه اكيد الفنانين الكبار مش هيفتكروه ومش هيعرفوا حتى ايه مشاكله وبالمناسبه كويس ان انت ما ممثلتيش عشان تفضلي تحسي بالناس وتشوفي الامهم انت لو كنت مثلتي كنت هتسكني في التجمع الخامس او حي راقي هتشوفي فقره فين حليكي معانا احسن

    ردحذف
  17. صباح الورد
    علي فكرة دي مش اول زيارة لاني جيت المدونة قبل كدة لكن ملحقتش حتي اني اقرا فيها حاجة لان الكهربة عملتها وقطعت ...
    تعرفي انت فكرتين بنفسي ايام ما كنت لسة يا دوب خمستاشر سنة وعلي البحر عندنا سجلنا في برنامج في الشرق الاوسط وقابلنا ناس عملوا معنا نفس الحكاية بس مش فيلم لاء غناء ...اصل كنت مهوسة بالغنا ومازلت برضه برغم شغل الصحافة دلوقتي...
    بالنسبة للفنانين والريس هقولك شيء بسيط جدا ....ما دام لسة فاكرين ان الواقع اللي بيقدموه في المسلسلات والسينما هو الواقع الحقيقي في البلد فانسي ان الفن يكون رسالة ...لان الواقع عمره ما هيكون في شكل العربيات ولا الفيلات ولا زي زهرة اللي طلعت من حارة لآعلي علو فيكي يا مصر ...وما دام لسة فنانينا اللي عدوا السبعين بيمثلوا ادوار المراهقين وبياخدوا ملايين لا يستحقوها وبيفكروا بس في عيد للفن او معاشات بالشيء الفلاني ولا يعرفون البسطاء الذين يتحدثون عنهم ...احيانا بقول لو احنا مكانهم هنتغير زيهم والا احنا لسة فينا برائتنا اللي هتخلينا نحس باللي شوفناهم ونساعدهم ...احييك بشدة علي كلامك الجميل ...وسعدت جدا بزيارتك والتي اتمني ان تدوم

    ردحذف

خلل براحتك من غير انتظار .. فتافيت أصلاً بتحب الخيار