06 أغسطس 2010

الصيــــن هي الحــل!!!


أكيد كلنا متابعين يوميات المذيع اللامع قاتل بنت العلاف
مش هاتكلم في الموضوع لأن قتل بحثـًا زي ما بيقولوا
بس هاقول كلمة حق.. الراجل ده سيس


سيس عشان لو اللـّ حكاه صح
يبقى عيل وبريالة والست لعبته على واحدة ونص
وسيس لو كذب في اللـّ حكاه
عشان هايبقى بدل ما يكحلها عماها.. وديه مراته برضو
وسيــس في الحالتين

لأنه بيتكلم عن واحدة في ذمة الله.. وكانت على ذمته
ونازل تريقة على وزنها مرة
ونسي انه ياما نام في حضنها بوزنها ده
ولا كان مثلا متجوزها مع إيقاف التنفيذ؟؟!

وكمان نازل إهانة فيها وفي وسطها الاجتماعي وأهلها
وبرضو نسي انه أتجوزها وناسب أهلها دول
ولا كان شارب حاجة أصفرة في كباية أكبرة
لما حط إيده في أيد العلاف أبوها؟؟!

ولا يا قلب أمه.. علّمته الحشيش والبانجو
وهو طبعا مسكين زي ما سمع كلامها واتجوزها غصب واقتدار
برضو بقى مدمن غصب واقتدار .. والنبي قطع قلبي
يلا أهو ربنا قادر ياخد حقها
وقادر ينصفه لو مظلوم

وطبعا كلنا سمعنا.. عن اللـّ علق نفسه في كوبري قصر النيل
عشان مقدرش يتجوز اللـّ بيحبها
وبرضو سمعنا عن اللـّ صعق نفسه بالكهربا في منطقة حساسة
عشان برضو مش قادر يتجوز ويشبع الغريزة اللـّ عنده
وكمان كلنا قرينا اللـّ قطع عضوه لنفس السبب
اللـّ صعق بيه الأخ اللي فوق نفسه

نستنتج من ده كله إيه بقى؟؟؟
إن الست المصرية هي سبب كل الأذمات الحالية
ستات تجيب الهم.. ما تنفعش في حاجة
تنفع بس تتقتل.. أو تنكد ع الراجل
ولهاذوهي الأس
باب.. قررت الأمبراطورية الشكيكة الصينية
إنها تحل لشبابنا مشاكله كلها
وتصدرلنا نسوان صنع في الصين
فرز تاني زي الفل.. مين قال هات؟؟

يعني لا تقتل مراتك.. وتصعق نفسك
الحل بسيط تدخل جمعية مع أم تيتي وتقبضها الأول
وتروح تطلب عروسة صينيه بكام.. بـ1500 جنيه
يا بلاااااااش والله.. حاجة لوز العنب


لا وإيه.. لما البت الصينية بتاعة عايسة كلابية
بتجي عندنا.. بتقول الأول إن الكلابية ديه ب150 كنيه
وأنا باخدها منها في الأخر ب30 كنيه.. يوووه قصدي جنيه
يبقى أنت وشاطرتك بقى.. تهز سعر العروسة
وتوصل لأحسن سعر .. وممكن تشتري 4 بسعر الجملة

وإيه بقى قصيرة سوفيفة.. لا تـُرى بالعين المجردة
بمتر وربع قماش من الوكالة تكسيها وتلبسها
وفي درج الكومودينو.. افرش بس أنت منديلين قماش
وهي هاتنام على واحد.. وتتغطى بالتاني
وممكن تجيب منها أتنين.. واحدة في السفرة وواحدة في الأنتريه
والله وهاتبقى أرخص من النجف.. أطلبها بتنور
وأكيد هاتنور.. هي الصين بتغلب يعني

وبعدين هاتوفر عليك تمن الميبدات الحشرية
واشي راجون وعلى بيرسول وريد
هي هاتكل كل الصراصير والخنافس والدبان
اللي في البيت.. وهاتشوي وتسلوق وتحمر
وأنت ها تاكل يا مـُهي

غير إنك بعد جوازها هاتمضن أن مافيش كلب
فيكِ يا مصر يقدر يجي جنبك ويعضك
لأن المدام أصلا بمجرد ما يجي جنبك هاتعضه هي
وتصطاده.. وتبقى الست الوالدة دعيالك
هاتكل فتة كوارع كلابي.. تستاهل بـُقك

ده كله كوم.. وإنها مش هاتقدر تنكد عليك كوم تاني
لإنها هاتقضيها هيها ونيها وبيها.. وبويا ومويا
وأنت طبعا ولا فاهم لها .. وهاتعيش يا برنس
ومش بعيد يبقى فيه اوفر.. لو خدت اتنين
تاخد عليهم مترجم.. فور فري

قال يعني إحنا عندنا أزمة حريم.. بلا خيبة
ده مصر أزمتها في الرجالة.. بينقرضوا
هو أحنا نافعين لوحدنا.. لما تبقى فيه منافسه دولية؟
وبعدين ليه بيصدروا لنا عرايس بس.. ؟؟
ولا ده عشان المصري معروف بقوته وجبرواته؟؟

يلا بلا خيبة عليهم
اللي خدته القرعة.. تبقى تاخده أم عيون ضيقة

وزي ما الناس كلت الغشاء الصيني.. بألف هنا
بكره تاكل العرايس الصيني.. وصحتين وعافية

ويبقى الجيل الجديد.. جيل المستقل
ملعوب فيه أساسه.. :@

ديه قصة قصيرة اسمها
زوجة تقلـــيد
قصة نهايتها مرعبة.. اقرواها
قرتها من 5 سنين.. وأهو
كل اللي حكاه بيحصل
ربنا يستر

::




هناك 14 تعليقًا:

  1. فتن كقطع الليل المظلم والله يا فتفوته

    أنا أول ما قريت عن الأخ الصحفي انها فضلت وراه تقرفه في عيشته وتهدده لما اتجوزها ...قلت في عقل بالي اخص عالرجاله ........وبعدين قلت بلا قرف وجرايد و اخبار تقلب المعدة سيبك انتي خلينا نستعد لرمضان ...رمضان مبارك عليكي يا ستي ....بس عجبتني العروسة الصيني وقررت اعمل جمعيه وادخل ب 4 افراد علشان اجوز الاتنين الصبيان الكبار واحجز عروستين صيني للاتنين الصغار ...فرصة في الرخص قبل ما يغلوا ...وعلى راي مرشدة سياحية قالت لزوجي وهو في زيارة للصين : احنا بناكل كل حاجه ماشيه عالأرض إلا العربيات وبناكل كل حاجه ماشيه في البحر إلا المراكب ....دي حاجه هايله نظرا لازدياد الصراصير والفئران في مصر (:

    تحياتي

    ردحذف
  2. بلا وششششششششششششش
    خلي الستات المصرية ترتاح
    دي قصص الإفترا والبطر والمكر بقت تقرف البوبي اللي ها تاكله الصينية
    وعلى الأقل لما تيجي الصينية
    ها تشرد له دولي
    وتبقى سمعته مصيتة انترناشونال
    ماهي مش ها تفهمه لما يقول لها استري عليا انتي معندكيش اخوات صبيان
    ده غير ان لما الصينية تخرج تصوت من مصر كلها مش ها يقول عليها جبروت ومستقوية بمشيرة
    وبكده نلاقي هنا سوق تاني خالص
    من رجالة ها تقول دي المصرية دي هي المطلوبة
    وبكده المصرية هي كمان تغير عتب

    قطيعة
    محدش بياكلها بالساهل

    ردحذف
  3. هههههههههههههههههههههههههههه
    كلامك فى محله
    بجد
    بس
    نقص اخلاق
    ومبادىء
    فى الاول
    والاخر
    نحل مشكله العنوسه اللى فى بلدنا الاول
    وبعدين نروح
    على البلاد المجاوره ولا احنا بنستهلك15مليار جنيه منشطات سنويا
    ليه ؟
    المذيع حطم نفسه بنفسه

    ردحذف
  4. مش عارف بس انتوا جايين ع الصين قوى كدة ليه

    ليه متقوليش ان احنا اللى فينا الغلط

    و المذيع صدقينى انا مش متابع اى حاجة من الموضوع دة اساسا

    و بعدين انا من اللى مش بحب موضوع جواز الأجانب
    مش تعصب صدقينى

    بس بالرغم من كل شيىء المصرية هى المصرية
    صدقين أحسن الكل

    ربنا يصلح حال الجميع

    ربنا معاكى

    ردحذف
  5. السلامو عليكم

    أيه ياستى كل ده
    والله ضحكتين قوى
    معلش دخلت كده من غير احم ولا دستور

    أسلوبك الساخر جميل جدا جدا
    ومشوق والله تنفعى كاتبه
    مش بهزر انا بتكلم بجد
    أنا أول مره أزور مدونتك الرائعه ديه وده من حظى وليا الشرف طبعآ

    نرج للبوست الجامد ده
    اولآ الموزيع ده كداب
    بس مش فى كل كلامه
    الحكايه اللى قالها ديه كلام محامين علشان القتل لبسه لبسه
    عيزين يبعدو حبل المشنقه على رقابته
    وتبقى مؤبد ولا 10 سنين
    كده ياعنى
    والله اعلم بالحقيقه

    أما بقى العروسه الصينى ديه حكايه
    قال يعنى احنا ملاحقين على النسوان اللى عندنا
    هناخد صينى
    صينى
    هى ناقصه
    طيب الست المصريه ساعه غضب كده هتستحمل قلمين ولا زغده فى كتفها ولا شلوط على الماشى
    أما الصينيه ديه تنكسر وقتى
    وكمان ملهاش قطع غيار
    لالالا
    بجد مينفعش مفيش زى البنت المصريه
    فى رقتها وحنيتها وتفاهمها قلبها الطيب
    كفايه طبخها
    ياسلام
    صينى ايه
    بلا صينى بلا يابانى المصرى هيرجع تانى

    أنا سعيد جدا جدا بمرورى على مملكتك الجميله
    وأتمنى يكون هناك تواصل مابينا بأذن الله

    ويارب مايكنش تعليقى تقيل على قلبك

    تقبلى مرورى الاول وليس الاخير

    تحياتى لقلبك الجميل


    محمد التركى

    ردحذف
  6. هو غير انه راجل سيس فهو قاتل ويستحق القتل :)

    على الرغم من كل المبررات التي تبدو مقنعه فلا عذر له للقتل

    أما الزوجة الصينيه فلا فرق بينها وبين الروسية أو حتى الأوروبية فالإنسان نسيج واحد في أي مكان .. أما المتاجرة فهذا شأن آخر وعلى من يريد المتاجرة بالزواج أن يدفع الثمن من عمره وكيانه ولا عزاء للرجولة :)

    ايه المآسي الشنيعة بتاعة الشنق والصعق والبتر دي ؟؟؟ انا قشعرت يا شيخه :)
    اللهم احفظنا يا رب :)

    ردحذف
  7. ليه يا فتفوته
    اهو هو ده الجبروت
    اعلان لزواج الصينيه و خليتي ماحدش يقدر يشتري
    ممكن تزلوا زوجه بنكهات
    يعني بنكهة الجمبري او الكاتشب
    و ساعات بنكهة الفانيليا و الشوكولاته

    ثبت بالبحث العلمي ان المصريه نكديه بطبعها و بتقلق من الفرح لما تفرح كتير تبقي مستكترة الفرحه تشغل النكدو بتخاف م الحسد يعني لو سعيده مع جوزها لازم تحكي عنه انه بخيل او ثقيل
    عشان العين
    بس تعرفي احلي حاجه في المصريه الجدعنه و بتظهر في وقت الزنقه عشان كده بنحبها و نقدرها اللي ناقصها تدي الامان هترتاح و لا يمكن يبقي فيه زيها في الدنيا


    و حشتيني
    تحياتي

    ردحذف
  8. سيس اه سيس قوووووووووووى

    وعروسه صينى
    يالهوتينى يا بوووووووى
    ومالها المصريه ربنا قال عليها ايه كخه
    طيب دى المصريه جبل اللى بتستحمله من الرجاله ميستحملهوش حمار لوماخذه يعنى
    طيب الصينيه دى يوجد لها قطع غيار
    طيب قطع الغيار متوفره بسعر معقول ولا قطع الغيار غاليه نشوف واحده جديده احسن
    ياللا.... حيروحوا من ربنا فين

    اسعدنى تواجدى فى مدونتك
    فعلا جميله وسردك للموضوع اجمل واسلوبك رائعععععععععععع
    دى اول زياره ليا وانا شاء الله مش ح تبقى الاخيره
    ربنا يسعدك ويفرح قلبك

    ردحذف
  9. همووووووووووت ضحك يخرب بيت كده بقالي كتير مدخلتش المدونات أساساً ومكنتش اعرف انك اصلا كتبتي حاجة جديدة الا صدفة
    بس بجد ضحكتيني اخر حاجة

    ردحذف
  10. ربنا يسترها معانا
    منعرفش ايه اللى جاى
    وهيعملوا فينا ايه اكتر من كدا
    خليهم يروحوا ويتجوزوا الصينيه
    ويشوفوا الفرق
    وساعتها هيحلفوا بينا
    يا بنتى مفيش احسن من المصريه هى اللى بتستحمل غتاتة الرجاله وياما بتشيل من حمل
    بس هما مع الاسف مش مقدرين
    الراجل يقدر يسعد الست ويقدر يقرفها فبتالى هتكون نكديه من عمايله
    اما السيس دى انا لسا اول مره اسمع عنها عندك فى المدونه
    والله الواحد بيستعجب !!!!
    سعدت بزيارتك يا فتافيت ويارب متكنش الاخيره
    كل سنه وانتى طيبه
    دمتى بخير

    ردحذف
  11. كل عام وانتي بألف خير وسعادة
    ربنا يتقبل منا ومنك رمضان
    ويعيده عليكي وعلى اسرتك الجميلة بكل خير وسعادة يارب
    تحياتي

    ردحذف
  12. انت بتحبي الخيار بجد ولا هزار .. ك الخيار في شهر البركه وشهر الصدقه وشهر الحاجه زهره بقى ب12 جنيه دا النوع التجاري اللي واخد ابر كورتيزون عشان يوزن في الميزان اما الخيار النوع الهاي بتاع المخلل دا بقه ب 16 جنيه ! واذا كنت ح تنق خياره خياره .. الحركه ديه لها سعر تاني حسب الشكل ! أصابع الببو لها سعر! والخيار ابو ديل له سعر ! والخيار العجالي التخين له سعر ! زي واحد كتب اعلان على كوم الخيار ( شكل تاني خيارك انت شكل تاني ) وناس تقولك يلله اهو كله في الخيار ! وناس تقولك لأ .. كله في الخيارات .. ايه ده .. هو في ايه ؟ هو في خيار وخيارات ؟ يعني ح يجي يوم ونشوف واحد خيار ماشي مع وحد خياره في الشارع زي اللي بنشوفهم في حديقة الأندلس ! واحد خيار قاعد كده بيتفشخر ع البت بتاعته أسف ع الخيارة بتاعته وبيقولها انت مدرتيش ! أصلا أنا قبل م اختارك كان قدامي عدة خيارات ! الخياره الأولى بت غلبامه رفيعه وناشفه م حبيتهاش وخياره تانيه كانت ف الأعداديه قلت م تنفعش وم تستحملش حاكم انا مخي ده تخين حبتين ! قلت مبدهاش بقه لازم يكون عندي قدره ع الأختيار .. وقلت ف بالي أنا عاوز خياره جامعيه ملعلطه كده بريحة الخيار البلدي واشتريتك انت ! عاوز اااااأقرمك دلوقت .. قلت ايه يا خيارتي ؟ وبعدين راحو العشـه !!!
    -------------
    العرايس الصيني موجوده فعلا .. شفت العروسه اللي في الصوره .. عندنا أحلى منها ونوع تجاري مستعمل مع كفاله تحت التجربه 3 شهور!
    تلاغيك بكل اللغات وعالسلم الموسيقي .. تعلي توطي حسب البطاريه واحسن نوع عربيسول ! هي تقليد ل دوريسول ! بس عشان العربيسول رخيصه قوي بسعر التراب وتقدر تلاقيها في كل مكان في الحواري وع الترع وع الزباله !
    والعروسه حسب الأعلام متجيش وجيبها فاضية لأ .. تيجي ومعها كل مستلزماتها من قطع خيار وغيره .. بصراحه انا مشفتش .. بس بيقولو بيكون معاها في العفش شوال أغشيه جديده نوفي .. كل يومين تفاجئك ب بنت بنوت .. الصينين ناس بتشغل بذمه وضمير.. الهي يخرب بيت التطور الصناعي اللي قلب الدنيا .. وقلب لنا قيمنا وخرب أخلاقنا .. لكن رأيي .. بلاها الصين وبلا اغشيتها .. البلدي مضمون .. البلدي يوكل !

    ردحذف
  13. انت بتحبي الخيار بجد ولا هزار .. ك الخيار في شهر البركه وشهر الصدقه وشهر الحاجه زهره بقى ب12 جنيه دا النوع التجاري اللي واخد ابر كورتيزون عشان يوزن في الميزان اما الخيار النوع الهاي بتاع المخلل دا بقه ب 16 جنيه ! واذا كنت ح تنق خياره خياره .. الحركه ديه لها سعر تاني حسب الشكل ! أصابع الببو لها سعر! والخيار ابو ديل له سعر ! والخيار العجالي التخين له سعر ! زي واحد كتب اعلان على كوم الخيار ( شكل تاني خيارك انت شكل تاني ) وناس تقولك يلله اهو كله في الخيار ! وناس تقولك لأ .. كله في الخيارات .. ايه ده .. هو في ايه ؟ هو في خيار وخيارات ؟ يعني ح يجي يوم ونشوف واحد خيار ماشي مع وحد خياره في الشارع زي اللي بنشوفهم في حديقة الأندلس ! واحد خيار قاعد كده بيتفشخر ع البت بتاعته أسف ع الخيارة بتاعته وبيقولها انت مدرتيش ! أصلا أنا قبل م اختارك كان قدامي عدة خيارات ! الخياره الأولى بت غلبامه رفيعه وناشفه م حبيتهاش وخياره تانيه كانت ف الأعداديه قلت م تنفعش وم تستحملش حاكم انا مخي ده تخين حبتين ! قلت مبدهاش بقه لازم يكون عندي قدره ع الأختيار .. وقلت ف بالي أنا عاوز خياره جامعيه ملعلطه كده بريحة الخيار البلدي واشتريتك انت ! عاوز اااااأقرمك دلوقت .. قلت ايه يا خيارتي ؟ وبعدين راحو العشـه !!!
    -------------
    العرايس الصيني موجوده فعلا .. شفت العروسه اللي في الصوره .. عندنا أحلى منها ونوع تجاري مستعمل مع كفاله تحت التجربه 3 شهور!
    تلاغيك بكل اللغات وعالسلم الموسيقي .. تعلي توطي حسب البطاريه واحسن نوع عربيسول ! هي تقليد ل دوريسول ! بس عشان العربيسول رخيصه قوي بسعر التراب وتقدر تلاقيها في كل مكان في الحواري وع الترع وع الزباله !
    والعروسه حسب الأعلام متجيش وجيبها فاضية لأ .. تيجي ومعها كل مستلزماتها من قطع خيار وغيره .. بصراحه انا مشفتش .. بس بيقولو بيكون معاها في العفش شوال أغشيه جديده نوفي .. كل يومين تفاجئك ب بنت بنوت .. الصينين ناس بتشغل بذمه وضمير.. الهي يخرب بيت التطور الصناعي اللي قلب الدنيا .. وقلب لنا قيمنا وخرب أخلاقنا .. لكن رأيي .. بلاها الصين وبلا اغشيتها .. البلدي مضمون .. البلدي يوكل !

    ردحذف
  14. أنا آسف جدا .. لقد تكرر الأرسال مرتين .. ومش عارف كيف اعالج الخطأ ! ممكن حد يقولي ؟ شكرا

    ردحذف

خلل براحتك من غير انتظار .. فتافيت أصلاً بتحب الخيار