24 يناير 2009

الست نعامة.. أسفة ليكِ يا أختي.

انهاردة هاتكلم عن فتفوتة عن جملة.. كلنا عارفنها كويس.. ويمكن مافيش حد فينا ما أستعملش الجملة ديه في كلامه.. وبجد فيها ظلم فظيع وجهل أفظع.. وتحس إن اللي بيقول الجملة ديه مش فاهم حاجة خالص.. وحتى خايف يشغل مخه.. لا يفهم لا سمح الله.


(زي النعامة .. بتدفن راسك في الرمل)








بزمتكم .. مين فيكم ماقلش الجملة دية في كلامه ولو مرة واحدة؟؟.. مين فيكم ما أتهمش حد إنه زي النعامة بيدفن راسه في الرمل؟؟.. مين فيكم ما أستعملش الجملة دية علشان يوصف حد بالغباء أو السلبية؟؟

والحقيقة بقى.. إن الست نعامة حفظها الله.. عمرها ما دفنت راسها في الرمل أبداً.. وياعيني عليك يا أختي يا نعامة مظلومة والله طول عمرك.
النعامة يا سادة بتحط راسها بس على الرمل.. علشان تسمع صوت الرياح.. وتحاول تحدد إتجاها وبعد كدا تبدأ تحدد هاتعمل إيه؟؟ وإيه الإتجاه الأمثل علشان تتحرك بسهولة.
ولا عمرها دفنت راسها لا في رمل ولا حتى تراب.. أصل بالعقل كدا لو دفنت راسها في الرمل.. هاتتخنق وتفطس.. وتبقى كدا الست نعامة بتنتحر والمفروض بقى إنها تكون إنقرض من زمان أوي.
لكن سبحان الله.. إظاهر إن اللي إنقرض هو عقل الناس وفهمها.. عمالة تقول النعامة بتدفن راسها.. وأوعى تعمل زي النعامة الكوخة وتدفن راسك في الرمل.. والنعامة بريئة من كل الإتهامات دية.
النعامة مثال رئع كلنا المفروض نقلده.. قبل ما نعمل إي خطوة أو ناخد أي قرار لازم ندرسه كويس.. ونشوف فين إتجاه الخطر.. علشان ما نروحش ليه برجلينا.. مش نتهامها بالغباء.
الغباء والسلبية صفة بشرية.. إي كائن حي تاني برئ منها.. لأن ببساطة ربنا سبحانه وتعالى.. خلق الإنسان وكرمه بالعقل وفضله به عن باقي الكائنات الحية.. وبما إن العقل عند البشر بس.. يبقى الغباء عند البشر بس.
كمان السلبية ديه بتاعتنا إحنا بني الشر.. عمرك شوفت كائن حي ممكن يفضل واقف يتفرج على الخطر جاي نحيته ويقف ساكت (ويدفن راسه في الرمل).. طبعا لا.. كل الكائنات إيجابية بالفطرة اللي ربنا فطرهم عليها.. ده كفايا إن أول درس الإنسان أتعلمه.. كان من غراب.
إحنا يا سادة لو كنا بصينا للنعامة بنظرة إيجابية.. كنا أتعلمنا منها كتير.. كنا بقى حالنا أحسن من كدا.. كنا عرفنا الخطر جاي منين.. مش ندفن راسنا في الرمل.. ونقول معاهدات سلام.. نقول اتفاقيات لازم نلتزم بها.. يارتنا كنا نعام.
يا نعامة هانم .. أسفة يا ستي على ظلمك من بني جنسي.. أسفة على إتهامك بالزور.. ومين عالم مش يمكن تكوني بتقوللي للنعامات صحباتك...
(بلاش تبقوا زي العرب.. وتدفنوا راسكوا في الطين.)

هناك 18 تعليقًا:

  1. رائع البوست
    الصراحه اول مره اعرف المعلومه دى
    مع اعتزارى الشدشد لكل نعام العالم
    ومع اسفى على كل اللى لسه بيدوروا فى الطين عن روسهم

    ردحذف
  2. اولا ميرسي اوي.. كنت حاسة اني بكتب للتاريح ومحدش هايحس بالمدونة.. انت اول تعليق عندي

    والست نعامة قلبها طيب اوي.. بديل انها عايشة وساكتة وماعملتش مظاهرة تندد باهانتها

    وربنا يعين اللي بيدوروا في الطين .. يا راسهم تطلع من الطين .. يا يفطسوا ويبقوا قدموا خدمة للبشرية

    ردحذف
  3. هو انت RoRaZ ولا تشابهه اسماء؟؟
    لو انت فعلا,اول مرة اعرف انك عندك مدونة ولاقتها بالصدفة.
    جميل الموضوع, والاحلى انه بالعامية
    مش حقولك انا مين, يمكن تعرفيني لوحدك.
    سلام يا زعيمة :)

    ردحذف
  4. بوست جامد يا فتافيت .. بس ليا تعليق صغير عليه العرب مش بيدفنوا راسهم فى الطين بيدفنوا راسهم فى حاجات تانيه ريحتها وحشه ... و الحقيقه انه اغلب الناس دلوقتى ماندهاش عقل ، عندها جزمه
    مبروك على المدونه و مستنين بوستات كتير

    ردحذف
  5. Brilliant posting!!!!
    Congratulations!!!!!!
    Have a nice week!!!!!

    ردحذف
  6. جميل أوي المعلومة الجديدة دي
    وبصراحه من وأنا بقرأها حسيت بالأحراج الشديد للست نعامة والله
    وربنا يسامحنا بقي علي اللط في حقها
    ويا اما نلاقي تشبيه تاني للعرب
    يا أما العرب يبطلوا عمايلهم والتشبيهات الحلوة ساعتها كتير

    ردحذف
  7. غير معرف

    ايوة أنا RoRaZ
    مادام عارفين .. يبقى اكيد عارف انها واحدة بس مافيش مني اتنين
    وللاسف ماعرفتكش .. المرة الجاية بقى ابقى اعرفك
    سلام يا بوووووص

    ردحذف
  8. che

    نورت البوست والمدونة
    ويا سيدي خلينا احنا الكبار ومشيها طين وخلاص.. ومع الاعتذار للطين اللي راس العرب فيه
    بس على فكرة الناس نعدها عقل .. بس خايفة تستخدمه.. اصله مخالف للوية العربية
    والله يبارك فيك .. وان شاء الله هتلاقي بوستات كتير .. وميرسي تاني على زيارت البلوج
    سلام

    ردحذف
  9. Tamer Diab

    والله الاحلى ان البوست عجبك
    وكلنا مكسوفين من الست نعامة حفظها الله .. واكيد هي عذرانا .. ما هي اكيد عارفة اننا عرب

    وعلى ما أظن ان اي حاجة ممكن تحصل .. غير ان العرب يغيروا عمايلهم

    نورت البلوج تامر باشا

    ردحذف
  10. بجد كلام جميل جدا لانه صح مائة بالمائة
    ان شاء الله نكون على تتابع

    احمد الشاعر

    ردحذف
  11. elsha3er

    رغم على حد قولك الكلام صح 100% لكن للاسف محدش كتير يعرفه
    نورت المدونة .. وان شاء الله
    نفضل على اتصال

    شرفتني

    ردحذف
  12. كلام منطقي

    بس ممكن اعرف هو حضرتك ليه مضايقه قوي كده

    واخده من موقف من بني البشر كده ليه

    او بتدافعي عن النعام بشكل رهيب كده ليه

    اعتقد انك اخده الموضوع بشكل شخصي

    ممكن اعرف فيه ايه


    بس بجد معلومه مفيده

    هيبقي الكلام بعد كده انت ليه مش بتدفن راسك في الرمل زي النعام

    ردحذف
  13. fahd

    الذ تعليق بصراحة .. حسستني اني من السلالة النعامية :)))
    يعني بزمتك مش حرام اننا عمالين نهزق في النعامة كل شوية .. وكل من هب ودب يقولك اوعى تعمل زي النعامة
    طيب يارتنا كنا نعام .. في وقت زي الوقت اللي فات
    كل دولة عربية اخدت النعامة (قبل الصحيح) قدوة ليها
    لكن لو كنا نعام .. كنا عرفنا فين الخطر وجاي من اي اتجاه
    كمان انا بحب لانشون لحم النعام .. فقولت ارد لها شرفها .. زي ما هي بترد ليا جوعي اوقات كتير
    بس انا بحب جنسي جدا .. بس مش عيب اني ازعل منهم

    يلا طولت عليك .. بس عجبني الكومنت موت

    ونفضل على اتصال ان شاء الله

    ردحذف
  14. نحن نعتذر اشد الاعتذار للسيدة نعامة طاووس بيه البجع
    وسوف انزل لها بوست اعتذار رسمي
    تقدري ياقمر تقولي اننا بقينا بنقولها تابو ومش بنفكر فيها فعلا
    بوست حلو حلو ولما نشوف ها تطلعيلنا فتافيت ايه تاني ياقمر
    ها انط ليكي على طول ان شاء الله
    تحياتي

    ردحذف
  15. ستيته حسب الله الحمش

    يادي النور يادي الهنا .. قوم ياض حب على ايد خالتك ستيته
    نورتي يا ست الكل .. فعلا احنا بنقولها بالوراثة
    والست نعامه حفظها الله .. قلبها كبير وسامحت
    كل الناس .. علشان ماكناش عارفين الحقيقة
    ويارب تفضلي تنطي هنا ع طول
    وان شاء الله فيه فتافيت كتير .. قريب
    وافر احترامي وتقديري
    تحااااااااتي

    ردحذف
  16. هههههههههههههههههه انا كمان عجبني اوي تعليق فهد
    وعلى فكرة معلومة فعلا اول مرة اعرفها


    بس معلهش بالغيظ فيكي بقى
    انا عمري ما قلت الجملة بتاعة زي النعامة دي :p

    مبروك يا روزة عالمدونة الجنان في كل حاجة حتى في التصميم
    وتوبيك حلو وجديد

    ردحذف
  17. نور الهدى

    نور يا جميلة.. منورة يا هندسة اخباااااااارك
    والحمد لله انها عجبتك.. انتى عارفة يهمكني رايك جدا :))

    مابتقوليش الجملة ماشي.. بس هي معلومة عندك ان النعامة حفظها الله بتدفن راسها في الرمل

    ومن حقهاانى اجيب لها حقها

    منورة يا هندسة

    ردحذف

خلل براحتك من غير انتظار .. فتافيت أصلاً بتحب الخيار