رمضان جانا .. أهلاً رمضان

كل سنة وكلنا طيبين.. يارب
رمضان كريم.. على كل الدنيا

صحيح اليميش غالي نار.. غالي بجد يا غااالي :@
يعني ارخص كيلو بلح ما يتاكلش بـ 12.. بس مش مهم
بلاش تاكلوا بلح.. كلوا بندق وفسدق ولوز :))
صحيح الفراخ بقت غالية .. الكيلو هنا بقى ب17 جنيه
سمعت انه في القاهرة ب25 جنيه
يلا بلاها فراخ كلوا لحمة :))
والسكر والزيت والرز.. قربوا يبقوا رفهيات


بس برضو.. مش مهم
اهو رمضان كريم.. وربنا أكرم

صحيح النور بقى بيتقطع كل يوم.. يعني عطش وحر
بس برضو يلا أهو يرحمنا من مسلسلات
رمضان الحصرية.. وسبحان الله
المسلسل اعلاناته على القنوات كلها
وحصري على كل قناة :))

۩˙·٠• رمضان كريم •٠·˙۩

مش عايزة ألك وأنا جاية أهني بس
ده كفاية الحكومة ربنا يعمر بيتها.. قولوا آمين
هتعلق التوقيت الصيفي.. عشان رمضان
ويا صباح الظروطة :))
هو بس سؤال بريء .. ساذج

الناس اللي عاصرت رمضان زمان لم جه في نفس التوقيت
ياترى الحكومة برضو عملت كده؟؟ ولا ده اوبشن لنا؟؟
والله ما عرفة هو فعلا الاوبشن ده لنا احنا
ولا للي عمرهم الافتراضي انتهى من زمان
ومش قادرين يصوموا خلاص.. وماسكين فيه

ما علينا بقى.. أهو جه يا ولاد.. هيصوا يا ولاد
كل سنة وانتم طيبين.. وينعاد عليكم
بالخير والبركة والهنا
يارب تقبل صيامنا.. وقيامنا
واغفر لنا.. وأرحمنا
آمـــيـــن يارب

۩˙·٠• رمضان كريم •٠·˙۩

الصيــــن هي الحــل!!!

أكيد كلنا متابعين يوميات المذيع اللامع قاتل بنت العلاف
مش هاتكلم في الموضوع لأن قتل بحثـًا زي ما بيقولوا
بس هاقول كلمة حق.. الراجل ده سيس


سيس عشان لو اللـّ حكاه صح
يبقى عيل وبريالة والست لعبته على واحدة ونص
وسيس لو كذب في اللـّ حكاه
عشان هايبقى بدل ما يكحلها عماها.. وديه مراته برضو
وسيــس في الحالتين

لأنه بيتكلم عن واحدة في ذمة الله.. وكانت على ذمته
ونازل تريقة على وزنها مرة
ونسي انه ياما نام في حضنها بوزنها ده
ولا كان مثلا متجوزها مع إيقاف التنفيذ؟؟!

وكمان نازل إهانة فيها وفي وسطها الاجتماعي وأهلها
وبرضو نسي انه أتجوزها وناسب أهلها دول
ولا كان شارب حاجة أصفرة في كباية أكبرة
لما حط إيده في أيد العلاف أبوها؟؟!

ولا يا قلب أمه.. علّمته الحشيش والبانجو
وهو طبعا مسكين زي ما سمع كلامها واتجوزها غصب واقتدار
برضو بقى مدمن غصب واقتدار .. والنبي قطع قلبي
يلا أهو ربنا قادر ياخد حقها
وقادر ينصفه لو مظلوم

وطبعا كلنا سمعنا.. عن اللـّ علق نفسه في كوبري قصر النيل
عشان مقدرش يتجوز اللـّ بيحبها
وبرضو سمعنا عن اللـّ صعق نفسه بالكهربا في منطقة حساسة
عشان برضو مش قادر يتجوز ويشبع الغريزة اللـّ عنده
وكمان كلنا قرينا اللـّ قطع عضوه لنفس السبب
اللـّ صعق بيه الأخ اللي فوق نفسه

نستنتج من ده كله إيه بقى؟؟؟
إن الست المصرية هي سبب كل الأذمات الحالية
ستات تجيب الهم.. ما تنفعش في حاجة
تنفع بس تتقتل.. أو تنكد ع الراجل
ولهاذوهي الأسباب.. قررت الأمبراطورية الشكيكة الصينية
إنها تحل لشبابنا مشاكله كلها
وتصدرلنا نسوان صنع في الصين
فرز تاني زي الفل.. مين قال هات؟؟

يعني لا تقتل مراتك.. وتصعق نفسك
الحل بسيط تدخل جمعية مع أم تيتي وتقبضها الأول
وتروح تطلب عروسة صينيه بكام.. بـ1500 جنيه
يا بلاااااااش والله.. حاجة لوز العنب


لا وإيه.. لما البت الصينية بتاعة عايسة كلابية
بتجي عندنا.. بتقول الأول إن الكلابية ديه ب150 كنيه
وأنا باخدها منها في الأخر ب30 كنيه.. يوووه قصدي جنيه
يبقى أنت وشاطرتك بقى.. تهز سعر العروسة
وتوصل لأحسن سعر .. وممكن تشتري 4 بسعر الجملة

وإيه بقى قصيرة سوفيفة.. لا تـُرى بالعين المجردة
بمتر وربع قماش من الوكالة تكسيها وتلبسها
وفي درج الكومودينو.. افرش بس أنت منديلين قماش
وهي هاتنام على واحد.. وتتغطى بالتاني
وممكن تجيب منها أتنين.. واحدة في السفرة وواحدة في الأنتريه
والله وهاتبقى أرخص من النجف.. أطلبها بتنور
وأكيد هاتنور.. هي الصين بتغلب يعني

وبعدين هاتوفر عليك تمن الميبدات الحشرية
واشي راجون وعلى بيرسول وريد
هي هاتكل كل الصراصير والخنافس والدبان
اللي في البيت.. وهاتشوي وتسلوق وتحمر
وأنت ها تاكل يا مـُهي

غير إنك بعد جوازها هاتمضن أن مافيش كلب
فيكِ يا مصر يقدر يجي جنبك ويعضك
لأن المدام أصلا بمجرد ما يجي جنبك هاتعضه هي
وتصطاده.. وتبقى الست الوالدة دعيالك
هاتكل فتة كوارع كلابي.. تستاهل بـُقك

ده كله كوم.. وإنها مش هاتقدر تنكد عليك كوم تاني
لإنها هاتقضيها هيها ونيها وبيها.. وبويا ومويا
وأنت طبعا ولا فاهم لها .. وهاتعيش يا برنس
ومش بعيد يبقى فيه اوفر.. لو خدت اتنين
تاخد عليهم مترجم.. فور فري

قال يعني إحنا عندنا أزمة حريم.. بلا خيبة
ده مصر أزمتها في الرجالة.. بينقرضوا
هو أحنا نافعين لوحدنا.. لما تبقى فيه منافسه دولية؟
وبعدين ليه بيصدروا لنا عرايس بس.. ؟؟
ولا ده عشان المصري معروف بقوته وجبرواته؟؟

يلا بلا خيبة عليهم
اللي خدته القرعة.. تبقى تاخده أم عيون ضيقة

وزي ما الناس كلت الغشاء الصيني.. بألف هنا
بكره تاكل العرايس الصيني.. وصحتين وعافية

ويبقى الجيل الجديد.. جيل المستقل
ملعوب فيه أساسه.. :@

ديه قصة قصيرة اسمها
زوجة تقلـــيد
قصة نهايتها مرعبة.. اقرواها
قرتها من 5 سنين.. وأهو
كل اللي حكاه بيحصل
ربنا يستر

::

أسطورة حب

حبي لك أسطورة..
بلا اسم.. بلا عنوان..!
حبي لك أسطورة
تـُنحر على أعتابها الأزمان...
وتسبح لأجلها الحروف بفلك الوجدان..!
حبي لك أسطورة
أرهقت كل الأذهان...
هي لوحة فنية لم يرسمها فنان.. جمعت كل الألوان..!
وبلمحة استثنائية..
مزجت الفرح بالأشجان..!
حبي لك أسطورة
مـُلكها العشق.. وعرشها الأمان..
وتحت سلطانها وُحِدت كل الأوطان..!
لا مسافات..
لا حدود..
لا أسلاك..
فكل سكانها إنسان..!
حبي لك أسطورة
هي أشبه بالهــذيان..!!
فلولا وجودها..
ما كان لي بين الأكوان.. كيان..!

عفواً.. إنه زمن الأهلي

ستين مليون ، من كل شكل ولون ..
عشان الأهلي ، كل شيء بيهون ..
لو رحت فيـن ، دايما معـاك ومهما كــان ، عمري ما هنسـاك
هعيش وأموت ، ومهما العمر يفوت وراك يا أهلي
أقول بأعلي صوت
الأهلي فــــــوق ، فوق الجمــــــيع
الأهلي فــــــــــوق ، فوق الجميـــــــــــع .

::

::

فريق كبير.. فريق عظيم

أديله عمري.. وبرضه قلــيل

:)

"خيــــــانــة..!!"

قصة قصيرة جداً


اكتشف خيانتها الإلكترونيــــة.. كاد أن يقتلها لولا دموع ندمها
عنفها بقسوة.. توسلت له...
أقسمت بمقاطعة الحاسوب مادامت حيّة..
صدقها فسامحها.. وبمجرد أن انصرف..
إلتقطت هاتفها النقـــال...
وبدأت بالإتصـــال..!!

::

أعلن الحداد... في يوم حداد المدونين

يا ريت كلنا نشارك.. في يوم الحداد
الجمعة.. 25/6/2010
الله يرحمك يا خالد

عــروض .. لا تقبل المنافسة

عـــايز.. نيــــو لــــوك

يجنن العقول.. ويبكي العيون
يحرق القلوب.. ويذل النفوس
عندنا .. بس أنت تيجي

عايز كسر فــ الجمجمة.. وقطع فــ الفك
عايز دم في كل مكان.. عايز تموت متهان
عندنا .. بس أنت تيجي

عايز تحس أنك حيوان
مالكش حقوق ولا لسان
عايز تحس أنك مالكش ضهر
ولا لك قيمة ولا حتى سعر
عندنا .. بس أنت تيجي

عايز تدوق الذل.. عايز تشيل الهم
عايز تموت مسحول.. ومحدش بيك يهتم
عندنا .. بس أنت تيجي

مع خالص الإهانة
والذل.. وموت القلب
إمضاء
مركز السحل والقتل
سيدي جابر

أسعارنا لا تقبل المنافسة
كل المطلوب
عدم إبراز الهوية الشخصية
مع سؤال بسيط.. أنا بتفتش ليه؟؟
بطريقة مهذبة.. وآدمية

عندها فقط.. سيقوم خبارائنا
بفن التعذيب والقتل بدم بارد
بعمل اللازم من

سحل.. وضرب.. وتكسير .. وقتل

في أقل من 20 دقيقة
بطريقة همجية.. ولاآدامية

لديـــــنا عروض خاصة
جـــداً للطلبة

حسبي الله ونعم الوكيـــل
حسبي الله ونعم الوكيـــل
حسبي الله ونعم الوكيـــل

اللهم أضرب الظالمين بالظالمين
وأخرجنا منهم سالمين

يا حرقة قلبي على شبابك
وعليك .. يــا
خــــــالد

:@

صدق أو انشالله ما صدقت.. مابراحتك يا عم

لا وربنا ما قدرة.. أنا بقالي فترة كل ما أشوف حاجة قصادي
أقول بس كده هي ديه البوست اللي جاي.. وتعدي وماكتبش حاجة
بس قولت أعمل حاجة تجمع (بعض) الحاجات
الغريبة اللي مرت عليا في هاذوهي الفترة وقررت أن اسمها يبقى
صدق أو انشالله ما صدقت.. مابراحتك يا عم

.. * .. * .. * .. * .. * ..

أولاً.. لأن في ثانيا وثالثا وهكذا يعني
قال إيه.. المرأة المصرية حققت المرتبة الأولى بين دول العالم
آه والله .. ما شاء الله .. ولا حول ولا قوة إلا بالله
أصل الحاجات ديه بتتنظر برضو يا جدعان
النبي حارسهن وصاينهن.. احتلن المرتبة الأولى في
ضرب أزواجهن.. عاااااااااااا عا عا عا

ولا وبنسبة 23% كمان.. يعني ربع ستات مصر علمت على رجالتها
لا تقوللي بقى أمريكية ولا هندية ولا ألمانية.. ولا حتى اسرائيلية
عفوا.. إنه عصر المرأة المصرية المفترية .. نيييهههههاي
ولكل راجل.. مقبل على الزواج..
بقوله الحل في خطوتين
الخطوة الأولى.. قوي قلبك وأشرب ديو
والخطوة الثانية.. أسترجل وأشرب بيرل
وأهي برضو مرتبة أولى حصلنا عليها
بدل ما أحنا دائما في أسفل القائمة

.. * .. * .. * .. * .. * ..

ثانياً ... مهو كان فيه أولاً فوق
أحد الشباب المكافح قرر
(ما شاء الله عندنا شباب بيقرر أهو)
إنه يعمل مزرعة سمكية.. عشان يساعد في حل أزمة السمك
الجهة المعنية.. وافقت على المزرعة ولكن بشرط
شرط واحد وبس.. عدم استخدام مياه النيل
طيب أخونا ده يستعمل مياه إيه بظبط؟؟
لازم يتصرف بقى.. يارب ربنا يفكها عليه من وسع
بس هو يصفي النية كده..
ويجيب معاه شركاء برضو
مهو لو أتصرف لوحده أحتمال يجيله جفاف!!
وتبقى مزرعة مساهمة مصرية..

بس كده مش هايبقى السمك ملوث؟؟
والله فكرة.. ونبطل نستورد سمك ملوث من بره
ويبقى عندنا أكتفاء ذاتي.. بنلوث سمكنا بنفسنا
وهي تبقى سلسة غذايئة كاملة.. مصرية 100%
شوفتوا بقى إن الجهة المعنية عندها بعد نظر؟!

.. * .. * .. * .. * .. * ..

هي ديه رقم كام؟؟.. المهم أخرها ــــاً
في ظل الغلاء (ظل وغلاء.. أصلي مثئفة)
اللي أحنا فيه
قررت الحكومة إنها تغلي سلعة حيوية جدا..
في حياة محدودي الدخل
وهي كوكو الضعيف.. سجاير كلوباطرة
(على رأي سووو)
بعد ما دلعوهم.. بعلبة جديد ولا وإيه لايت وفلة حمرا
غلوها عليهم.. بس مش ده اللي يندرج
(ثقافة ثقافة أصلي) تحت
صدق أو انشالله ما صدقت.. مابراحتك يا عم

الإفيه في إيه بقى.. إنه مجموعة على الفايس توك
هاتعمل وقفة أحتجاجية ونص الدعوة اللي جاتلي
"ندعوا كل النشطاء السياسيون من شباب الحركات والقوى السياسية المدخنون وغيرهم من المتضامنون ضد الغلاء التواجد فى الخامسة مساء السبت القادم لوقفة إحتجاجية أمام نقابة الصحفيين إعتراضاً على رفع سعر السجائر المحلية"
وصلي على رسول الله... شعار الحملة
قولها يامصرى قول متخفش
الكيلوبترا غيرها منــــشربش
نيييهههههههههههههاي
معرفش ليه أفتكرت الواد بتاع
من حقنا من حقنا نحمل بحضن يضمنا
الشعار ده.. أكيد هايكتبوه على ورق بفرة
وطبعا كل واحد يجي ومعاه كبريته.. وطفايته
وفي أخر اليوم.. سجارتين فرط لكل مشارك

.. * .. * .. * .. * .. * ..

ديه بقى اللي بعد اللي فوق
كنت بتفرج على ماتش للهاند بوول
بين الزمالك والسد القطري.. في الدوحة
وإذ فجأة أدور على قطري واحد في الملعب
مافيش نوهائي
طيب جول كيبر ولا مهاجم.. نييييييفر..
طيب مدافع مافيش
طيب حتى بيلم الكور.. برضو لا..
كل شوية اسمع اسم واحد روسي
قولت يمكن ديه الدوحة فرع موسكو..
وبعدين لاقيت فيه جمهور بالعقال
قولت ايه اللي جاب القلعة جنب البحر؟؟؟
قطر احتلوها الروس يا جدعاااااااااااان
وشوية والاقي.. حبه اسماء
اروبية من خارج روسيا

الجهل وحش برضو مهو ما حدش قالي
ان اتحاد اروبا نقله السد اللي مش قطري
فقولت لبابا.. معلش اهم لما يلعبوا
بالفريق القومي هيبانوا
وتقريبا المعلق كان بيلمع اوكر
عليا انا وابتي.. وقال
إن اللعيبة اللي بتلعب في السد اللي مش قطري..
مجنسة بالقطرية.. عشان لما يلعب
المتخب اللي مش قومي القطري
ياخد برضو.. بطولات.. عااااااااااااااا

طيب ايه احساس الناس ديه.. لما علم بلدهم يترفع

واللعيبة اللي واقفة.. حتى ماتعرفش تنطق
السلام الجمهوري؟؟..
يلا حتى الرياضة بالفلوس

.. * .. * .. * .. * .. * ..

وهنا نبقى وصلنا لنهاية حلقتنا الأولى من برنامج
صدق أو انشالله ما صدقت.. مابراحتك يا عم

وسؤال الحلقة بيقول....
لما قناة الرحمة يتشوش عليها.. وتغير ترددها
عشان قناة معادية للأديان الأخرى.. إزاي
قناة زكريا بطرس ماشية سكينة في الحلاوة؟؟
- عشان الحلاوة حلاوة سايبة
- عشان الحلاوة بار رشيد الميزان
- عشان السكينة من حديد مستورد
الفائز معانا هايفوز بعلبتين حلاوة.. فاضيين
يملاهم .. ويروح يساعد اخونا بتاع المزرعة
ويبقى له أسهم في المزرعة..
يلوث بيهم مستقبل عيــــــاله

عرض خاص.. عريس كل 42 ساعة

نظرا للإقبال الغير معهود.. من العرسان عليا
قررت.. أن المدونين كمان يبقى لهم نصيب.. أشمعنا هم
يعني في أسبوعين.. 8 عرسان شيء يفرح أي بنت طبعا
ده مش يفرح بس.. ده يخليها كمان فشر
مارلين مونرو في زمنها


8 عرسان يا جاه النبي.. يعني بسرعة عريس كل يومين إلا ربع !!

أمال إيه الاشاعات المغرضة ديه اللي بتقول مافيش عرسان؟

ده أنا كل 42 ساعة بجمع عريس
ومن غير ما خربش وأكسب

ولا كمان يفضلي رجل ناقصة.. أشتري عشانها
20 كارتونة شيبسي عشان الاقيها

هو بيكلم لوحده توماتيكو.. توماتيكو.. بعد 42 ساعة

لا وإيه.. عرسان عرسان يعني!!

من أعمار..ووظائف..وقطعيات مختلفة

طبعا التنوع مطلوب برضو..
عشان أعرف اختار صاحب الحظ السعيد

وطبعا حظه مش سعيد.. عشان هايتجوز فتافيت
نوووووووووووو

هي طبعا فتافيت أملة.. وحاجة يتحسد
عليها ايوتها راجل فيكي يا مصر

(حبه نرجسية على برانويا)
لكن فيه ميزة مهمة جدا

مش هيلاقيها في اي عرورة غيري
لذا نحن نختلف عن الآخرون

نحن لا ندع التميز.. ولكننا فعلا مميزون

الميزة يا سادة.. إن فوق عروسة فاتنة فرعونية (ديه أنا)
كمان هتاخد زيارة.. لمدة 3 شهور للكويت

يعني هاتجمع بين الفراعنة والخليج في اوفر واحد

وأظن ده مش هتلاقيه غير عندنا فتافيت
تميز تميز يعني

أنا مضيت عقد للسفر للكويت وكنت مسافرة

وإذ فجأة.. الفيزا وقفت عشان أنا
أقل من 40 سنة وغير متزوجة

وبما إن الــ40 سنة لسه عليها كتير.. ياه أنا فين وهي فين؟؟
ده حتى إحتمال أخد تأشيرة خروج من الدنيا قبلها
فقررت .. إني أغير الحالة الإجتماعية
لمتــــــزوجــــــة

لكن بشرط مهم.. عشان محدش يفهمني غلط
عروسة مع إيقاف التنفيذ..
عااااااااااااااااااا

جواز ع الورق وبس
اه اللي اوله شرط أخره نور

الشروط المطلوبة...:
عريس ابن ناس كويسين
شكله مقبوله
تعليم عالي .. ويكون مؤهله مطلوب بالخليج
زي دكتور محاسب مهندس مدرس سياحة... إلخ
الحالة الاجتماعية.. مش هاتفرق خالص
أهم حاجة بقى.. اسمه يكون بعيد تماما
عن عباس وزغلول وعبعال وحنتيرة وما أشبه
اه ده اسمه هايفضل لازق ليا طول عمري

المميزات:
بعد الجواز بستة شهور يتم.. ارسال زيارة حرة 3 شهور للكويت
يدور فيها براحته على شغل.. وممكن كمان اساعده في كده
تذاكر الطيران ذهاب وإياب عليا كمان

تفاصيل الوظيفة:
عريس مع إيفاق التنفيذ.. عريس لغرض السفر ليس إلا
لا يطالب بأي حق زوجي.. ولا يستخدم سلتطه الشرعية او القانونية عليا
يعقد القران.. بمهر ومؤخر رمزي جدا (جنيه لكلا منهما)

وفيه قصاده خياران.. ده طبعا لاني
مش هاثق في اي حد

الأول:
العصمة تبقى في ايدي
عشان اضمن الطلاق بعد دخوله الكويت

الثاني:
يمضي على وصل أمانة.. بــ100 ألف جنيه
يستحق السداد بعد 7 شهور من العقد.. يسلمني ورقة الطلاق
ياخد الوصل.. والتسليم برضو في الكويت

الطلاق في الحالتين..
طلاقة بائنة مافيش رد بعدها الا بعقد جديد
اه عشان ماحدش يفتكر اني مش عاملة حساب أي حاجة

الأوراق المطلوبة:
فيش وتشبيه.. وطبعا الغرض منه الجواز من فتافيت
لان ده مسمى وظفي جديد هاينزل مصر
شهادة صحية.. تؤكد خلوه من الامراض المزمنة
مش منظر يعني ابقى طليقة واحد جربان
نسخة من شجرة العيلة.. فرد فرد
مهو مش اخرتها ابقى فرد في عيلة سوابق
شهادة التخرج.. عشان أتأكد انه تعليم عالي
مهو مش هاصوم اصوم وافطر
على دبلووووون

ملحوظة:
حالة واحدة.. ممكن افكر فيها اني اغير رأي
ويبقى جواز بجد.. لو كان شبه مهند
عاااااااااااااااااا

قانون عقيم.. غبي بجد

يعني إيه عشان أقل من 40 سنة؟؟؟؟
على اساس اللي عايزة تنحرف.. بتوب في الاربعين؟؟
ولا ده سن الاعتزال الدولي يعني؟؟

وايه عشان انسة ديه؟؟؟
يعني لو مطلقة او متجوزة..
وحابة استهبل مش هاعرف؟؟
ولا الانسة طالعة تنحرف..
لكن المتجوزين ومطلقين فوق الشبوهات؟؟

يعني لو أنا اتجوزت.. مع ايقاف التنفيذ
ونفذت الاعلان اللي فوق
واللي فعلا جالي عروض بجد منه

طيب مهو هابقى مسافرة برضو
انسة تحت الاربعين؟؟؟!
سبحان الله
:@

حد ضايع منه كوبري؟؟؟

الساعة 4 الفجر.. الواد جاتله سخنية شديدة.. أمه قلبها أنفطر على أبنها

شالته على كتفها جري.. وخدت أبنها التاني في أيدها.. ونزلت بسرعة
على أقرب مستشفى.. جوزها فران على قد حاله
عنده ورديته للفجر في اليوم ده.. نزلت لوحدها

راحت تركب عربية توصلها لمستشفى إمبابة.. فالسواق قالها أسهلك تنزلي تحت الكوبري

وتمشي لحد المستشفى.. خدت ديلها في سنانها.. وعيل على كتفها قايد نار بيموت

وعيل في أيدها عنده عشر سنين.. عشان تلحق الطفل الرضيع من الموت..

وعلى الكوبري .. قام الواد اللي في أيدها واقع من حفرة في الكوبري

وقع من أيدها.. وقع في حفرة 40سم*80سم..
وقع الواد .. ومات لأن الحفرة العمود اللي فوقيها مش منور

وقع الواد.. ومات غرقان قصاد أمه

طبعا قمة الإهمال.. لما الواد يقع من أيد أمه.. المفروض كانت تربطه بسلسلة وكلبشات!

طبعا قمة الإهمال.. لما الواد يقع من تحت عمود مطفي.. مالبسش الكوتشي اللي بينور ليه؟؟؟
طبعا قمة الأهمال.. لما الواد يقع من حفرة 40*80.. المفروض كان نقى الحفرة المخصصة للاطفال!!.. هي فوضى ولا إيه.. ديه حفرة مقاس راجل كبير!

طبعا قمة الإهمال.. لما الواد يقع عشان أمه نزلة الفجر.. وديه قلة تربية برضو.. لو كانت ربت أبنها كويس كان سخن الصبح والدنيا نور.. وكان شاف الحفرة اللي هايقع فيها.. ونقى المخصصة للاطفال!

طبعا قمة الإهمال.. لما الواد يقع في الحفرة ديه.. يعني دولقتي لو واحد كبير عليه الدور يقع.. يعمل ايه بقى؟؟.. يروح حفرة الأطفال ويتزنق فيها قبل ما يقع.. ولا نديله وش صابون.. لزوم الزحلقة؟؟

الواد ده.. المفروض.. نعدمه على الإهمال والتسيب ده كله!!!!
واد مش متربي صحيح..
واد يستاهل يموت غرقان
آآآآآآآآآه يا قلب أمك يا ضنايا.. :(

المسؤولين.. قالوا أن الحفرة ديه..
تسمح بسقوط أي شخص بدون أحداث إصابات فيه أثناء السقوط!!

ويا حناااااااااااان الأم.. سسسسسسسسس..
أحفـــــــــــــــــــر

قلب خصاية يا ناس.. الدمعة هاتفر من عيني؟؟؟ حفرة كونفرتااااااااابل

حفرة.. تقع منها من غير ما تحس.. يعني
مادمت هاتقع إن بابلك.. ووز أويت فيلنج

يبقى سوووووووو واااااااااات..

ليه تقع متعور.. لما ممكن تقع وانت سليم!

الكوبري.. أبو فتحة 40*80 سم..
طلــــع أبن حــــرام

هيئة كباري القاهرة.. تنكر نسبه لها..
وهيئة كباري الجيزة تنكر النسب أيضا

يعني الكوبري ده.. طلع شياطني؟؟

أم الكباري في المولد بتاع سيدنا أبو الكباري الكبير..
ووقع منها الكوبري وهو صغير وتاه وماحستش بيه؟؟

ولا كان فيه شوية حديد وأسمنت ..
طلعين شيطاني.. قوم الدنيا مطرت ونبت الكوبري؟؟

حاسة أن الكوبري ده ساقط قيد.. والنبي ممكن؟؟

ولا الكوبري ده لاقيط؟؟..
يمكن أم الكباري غلطت مع كوبري ولما فضحتها بانت..
حطت الكوبري ده على شط النيل؟؟؟

الكوبري مش تبع القاهرة.. ولا تبع الجيزة..
يمكن تبع بني سويف؟؟

ولا الكوبري ده .. جمهورية مستقلة بنفسها...؟؟

الكوبري ده.. وقع من مين يا ناس؟؟؟

حد ضاااايع منه كوبري
:@ :@