عرض خاص.. عريس كل 42 ساعة

نظرا للإقبال الغير معهود.. من العرسان عليا
قررت.. أن المدونين كمان يبقى لهم نصيب.. أشمعنا هم
يعني في أسبوعين.. 8 عرسان شيء يفرح أي بنت طبعا
ده مش يفرح بس.. ده يخليها كمان فشر
مارلين مونرو في زمنها


8 عرسان يا جاه النبي.. يعني بسرعة عريس كل يومين إلا ربع !!

أمال إيه الاشاعات المغرضة ديه اللي بتقول مافيش عرسان؟

ده أنا كل 42 ساعة بجمع عريس
ومن غير ما خربش وأكسب

ولا كمان يفضلي رجل ناقصة.. أشتري عشانها
20 كارتونة شيبسي عشان الاقيها

هو بيكلم لوحده توماتيكو.. توماتيكو.. بعد 42 ساعة

لا وإيه.. عرسان عرسان يعني!!

من أعمار..ووظائف..وقطعيات مختلفة

طبعا التنوع مطلوب برضو..
عشان أعرف اختار صاحب الحظ السعيد

وطبعا حظه مش سعيد.. عشان هايتجوز فتافيت
نوووووووووووو

هي طبعا فتافيت أملة.. وحاجة يتحسد
عليها ايوتها راجل فيكي يا مصر

(حبه نرجسية على برانويا)
لكن فيه ميزة مهمة جدا

مش هيلاقيها في اي عرورة غيري
لذا نحن نختلف عن الآخرون

نحن لا ندع التميز.. ولكننا فعلا مميزون

الميزة يا سادة.. إن فوق عروسة فاتنة فرعونية (ديه أنا)
كمان هتاخد زيارة.. لمدة 3 شهور للكويت

يعني هاتجمع بين الفراعنة والخليج في اوفر واحد

وأظن ده مش هتلاقيه غير عندنا فتافيت
تميز تميز يعني

أنا مضيت عقد للسفر للكويت وكنت مسافرة

وإذ فجأة.. الفيزا وقفت عشان أنا
أقل من 40 سنة وغير متزوجة

وبما إن الــ40 سنة لسه عليها كتير.. ياه أنا فين وهي فين؟؟
ده حتى إحتمال أخد تأشيرة خروج من الدنيا قبلها
فقررت .. إني أغير الحالة الإجتماعية
لمتــــــزوجــــــة

لكن بشرط مهم.. عشان محدش يفهمني غلط
عروسة مع إيقاف التنفيذ..
عااااااااااااااااااا

جواز ع الورق وبس
اه اللي اوله شرط أخره نور

الشروط المطلوبة...:
عريس ابن ناس كويسين
شكله مقبوله
تعليم عالي .. ويكون مؤهله مطلوب بالخليج
زي دكتور محاسب مهندس مدرس سياحة... إلخ
الحالة الاجتماعية.. مش هاتفرق خالص
أهم حاجة بقى.. اسمه يكون بعيد تماما
عن عباس وزغلول وعبعال وحنتيرة وما أشبه
اه ده اسمه هايفضل لازق ليا طول عمري

المميزات:
بعد الجواز بستة شهور يتم.. ارسال زيارة حرة 3 شهور للكويت
يدور فيها براحته على شغل.. وممكن كمان اساعده في كده
تذاكر الطيران ذهاب وإياب عليا كمان

تفاصيل الوظيفة:
عريس مع إيفاق التنفيذ.. عريس لغرض السفر ليس إلا
لا يطالب بأي حق زوجي.. ولا يستخدم سلتطه الشرعية او القانونية عليا
يعقد القران.. بمهر ومؤخر رمزي جدا (جنيه لكلا منهما)

وفيه قصاده خياران.. ده طبعا لاني
مش هاثق في اي حد

الأول:
العصمة تبقى في ايدي
عشان اضمن الطلاق بعد دخوله الكويت

الثاني:
يمضي على وصل أمانة.. بــ100 ألف جنيه
يستحق السداد بعد 7 شهور من العقد.. يسلمني ورقة الطلاق
ياخد الوصل.. والتسليم برضو في الكويت

الطلاق في الحالتين..
طلاقة بائنة مافيش رد بعدها الا بعقد جديد
اه عشان ماحدش يفتكر اني مش عاملة حساب أي حاجة

الأوراق المطلوبة:
فيش وتشبيه.. وطبعا الغرض منه الجواز من فتافيت
لان ده مسمى وظفي جديد هاينزل مصر
شهادة صحية.. تؤكد خلوه من الامراض المزمنة
مش منظر يعني ابقى طليقة واحد جربان
نسخة من شجرة العيلة.. فرد فرد
مهو مش اخرتها ابقى فرد في عيلة سوابق
شهادة التخرج.. عشان أتأكد انه تعليم عالي
مهو مش هاصوم اصوم وافطر
على دبلووووون

ملحوظة:
حالة واحدة.. ممكن افكر فيها اني اغير رأي
ويبقى جواز بجد.. لو كان شبه مهند
عاااااااااااااااااا

قانون عقيم.. غبي بجد

يعني إيه عشان أقل من 40 سنة؟؟؟؟
على اساس اللي عايزة تنحرف.. بتوب في الاربعين؟؟
ولا ده سن الاعتزال الدولي يعني؟؟

وايه عشان انسة ديه؟؟؟
يعني لو مطلقة او متجوزة..
وحابة استهبل مش هاعرف؟؟
ولا الانسة طالعة تنحرف..
لكن المتجوزين ومطلقين فوق الشبوهات؟؟

يعني لو أنا اتجوزت.. مع ايقاف التنفيذ
ونفذت الاعلان اللي فوق
واللي فعلا جالي عروض بجد منه

طيب مهو هابقى مسافرة برضو
انسة تحت الاربعين؟؟؟!
سبحان الله
:@

حد ضايع منه كوبري؟؟؟

الساعة 4 الفجر.. الواد جاتله سخنية شديدة.. أمه قلبها أنفطر على أبنها

شالته على كتفها جري.. وخدت أبنها التاني في أيدها.. ونزلت بسرعة
على أقرب مستشفى.. جوزها فران على قد حاله
عنده ورديته للفجر في اليوم ده.. نزلت لوحدها

راحت تركب عربية توصلها لمستشفى إمبابة.. فالسواق قالها أسهلك تنزلي تحت الكوبري

وتمشي لحد المستشفى.. خدت ديلها في سنانها.. وعيل على كتفها قايد نار بيموت

وعيل في أيدها عنده عشر سنين.. عشان تلحق الطفل الرضيع من الموت..

وعلى الكوبري .. قام الواد اللي في أيدها واقع من حفرة في الكوبري

وقع من أيدها.. وقع في حفرة 40سم*80سم..
وقع الواد .. ومات لأن الحفرة العمود اللي فوقيها مش منور

وقع الواد.. ومات غرقان قصاد أمه

طبعا قمة الإهمال.. لما الواد يقع من أيد أمه.. المفروض كانت تربطه بسلسلة وكلبشات!

طبعا قمة الإهمال.. لما الواد يقع من تحت عمود مطفي.. مالبسش الكوتشي اللي بينور ليه؟؟؟
طبعا قمة الأهمال.. لما الواد يقع من حفرة 40*80.. المفروض كان نقى الحفرة المخصصة للاطفال!!.. هي فوضى ولا إيه.. ديه حفرة مقاس راجل كبير!

طبعا قمة الإهمال.. لما الواد يقع عشان أمه نزلة الفجر.. وديه قلة تربية برضو.. لو كانت ربت أبنها كويس كان سخن الصبح والدنيا نور.. وكان شاف الحفرة اللي هايقع فيها.. ونقى المخصصة للاطفال!

طبعا قمة الإهمال.. لما الواد يقع في الحفرة ديه.. يعني دولقتي لو واحد كبير عليه الدور يقع.. يعمل ايه بقى؟؟.. يروح حفرة الأطفال ويتزنق فيها قبل ما يقع.. ولا نديله وش صابون.. لزوم الزحلقة؟؟

الواد ده.. المفروض.. نعدمه على الإهمال والتسيب ده كله!!!!
واد مش متربي صحيح..
واد يستاهل يموت غرقان
آآآآآآآآآه يا قلب أمك يا ضنايا.. :(

المسؤولين.. قالوا أن الحفرة ديه..
تسمح بسقوط أي شخص بدون أحداث إصابات فيه أثناء السقوط!!

ويا حناااااااااااان الأم.. سسسسسسسسس..
أحفـــــــــــــــــــر

قلب خصاية يا ناس.. الدمعة هاتفر من عيني؟؟؟ حفرة كونفرتااااااااابل

حفرة.. تقع منها من غير ما تحس.. يعني
مادمت هاتقع إن بابلك.. ووز أويت فيلنج

يبقى سوووووووو واااااااااات..

ليه تقع متعور.. لما ممكن تقع وانت سليم!

الكوبري.. أبو فتحة 40*80 سم..
طلــــع أبن حــــرام

هيئة كباري القاهرة.. تنكر نسبه لها..
وهيئة كباري الجيزة تنكر النسب أيضا

يعني الكوبري ده.. طلع شياطني؟؟

أم الكباري في المولد بتاع سيدنا أبو الكباري الكبير..
ووقع منها الكوبري وهو صغير وتاه وماحستش بيه؟؟

ولا كان فيه شوية حديد وأسمنت ..
طلعين شيطاني.. قوم الدنيا مطرت ونبت الكوبري؟؟

حاسة أن الكوبري ده ساقط قيد.. والنبي ممكن؟؟

ولا الكوبري ده لاقيط؟؟..
يمكن أم الكباري غلطت مع كوبري ولما فضحتها بانت..
حطت الكوبري ده على شط النيل؟؟؟

الكوبري مش تبع القاهرة.. ولا تبع الجيزة..
يمكن تبع بني سويف؟؟

ولا الكوبري ده .. جمهورية مستقلة بنفسها...؟؟

الكوبري ده.. وقع من مين يا ناس؟؟؟

حد ضاااايع منه كوبري
:@ :@

مرحلة.. انتقالية.. لتاريخ مصر..!!

فكرت كتير أقول إيه في البوست ده نظرا لوجود أحداث كتيرة على الساحة
يعني مثلا.. ياترى أتكلم عن إلغاء نظام الإنتساب في الجامعات المصرية؟!
ليه بقى؟؟.. قال إيه لأن الجامعات بتاعة الحكومة فيها دلوقتي مليون و 600 ألف طالب!!
والجامعات الخاصة فيها 85 ألف بس؟؟.. يعني مافيش تكافؤ في السرعات!!
فبقى الحل أن ولاد الناس الفقرة ماتتعلمش تعليم عالي أصلا.. مادام مجموعها ماجبش كلية إنتظام
وطبعا أصلا مش هايجيبوا مجموع عالي... لأن مافيش فلوس ياخدوا دروس في الثانوية العامة
وليه بقى مافيش فلوس؟؟..

ده كان الموضوع التاني اللي كنت عايزة أتكلم فيه اللي هو
إن ما شاء الله.. اللهم لا حاسد متوسط الدخل الشهري للفرد المصري بقى 94 جنيه
زمان لما أبو جريشة عمل أغنية 145 جنيه.. كلنا أتريقنا ..أهم بقوا 94 جنيه وبس
طيب بالزمة.. 94 جنيه في الشهر ممكن يعملوا إيه للفرد المصري؟؟
وقال إيه اللي دخله 165 جنيه .. يبقى تحت خط الفقر زي ما اليونيسكو بتقول
معنى كده إننا في مصر.. عملنا خط جديد إيكسكلوسف للمصريين في موضوع الفقر
وزي ما شاء الله ما خالد أبو النجا دخل جينيس بعد ما سجل
أكبر عدد أعلام مرفوعة في وقت واحد
إحنا كمصريين من حقنا ندخل جينيس
بأن الفرد عندنا حفر خندق للفقر.. خلاص بقى كبرنا
على موضوع حد الفقر ده.. إحنا عندنا خندق الفقر عايشين جواه
إحنا مش تحت حد.. ودلوقتي بس فهمت ليه
كل اللي مسافرين بره بيقولوا
إحنا نازلين مصر أجازة .. صح؟؟

ولا أتكلم على الأزمة الفظيعة اللي في مصرنا الحبيبة دلوقتي..
وهي إختفاء عنصر من أهم عناصر التكيف مع البيئة المصرية
والمساعد الأول على التعايش مع وضعنا
وهو الحشيش.. فيه أزمة حشيش.. يا جدعااااااااااان
سمعت أن القرش بقى ب400 جنيه.. ده لو موجود أصلا
طيب بالزمة مش حرام.. يبقى متوسط الدخل 94 جنيه.. والقرش ب400 جنيه
طيب لما كان ب50 :80 جنيه.. كان معقول بالنسبة للدخل
قرش حشيش لكل مواطن
يساعده على التكيف والمعايشة للواقع
لكن دلوقتي.. خلاص مافيش لا تكيف ولا معايشة
ومافيش حشيش يا سعااااااااد

ولا أتكلم عن فرض رسوم على الدخول لوسط البلد وقت الزروة
(هي ذروة ولا زروة؟؟؟).. ما علينا بقى
لما سمعت الخبر ده.. خوفت بعد كده نركب عدادات على قفانا
يسحب مشينا كام كيلو.. ونتحاسب على عدد الكليوهات اللي مشيناها
وكل يوم خميس نصفر العدادات.. في مركز التصفير القومي
والمواطن يفضل واقف يستنى دوره.. وطبعا يروح بيته مهدود
بعد كده.. نبقى عملنا مصدر جديد للدخل القومي
وفي نفس ذات الوقت
نبقى قدمنا حل جذري.. لتنظيم الأسرة.. :)

بس بعد تفكير طويل في كل اللي فات
لاقيت إن في موضوع أهم من ده كله
حدث سجله التاريخ لمصر النهاردة.. حدث حلم بيه كل مصري
حلم غاب عننا 103 سنة.. بس عشان إحنا رجالة ووقفنا وقفت رجالة
حققنا.. وأنتصرنا على كل الظروف.. النهاردة والحمد لله
صوباع إخناتون.. وصل مصر من سويسرا بعد غياب 103 سنة
النهاردة بس حققنا حلم بقاله 103 سنة
خلاص أنسوا كل اللي فات من البوست
خلاص الصوباع رجع مصر
مش مهم مافيش نظام إنتساب.. مش مهم مافيش فلوس
والدخل بقى 94 جنيه.. مش مهم حتى الحشيش اللي مش موجود
لأننا كسبنا صوباع إخناتون.. وسبحان الله..
كالعادة التاريخ بيحب يعيد نفسه
وده فكرني بيوم ما اخدنا الصوباع التاني.. كان قرار صعب
بس برضو خدناه كلنا

وأعتقد إن الرسوم اللي هاتتحصل مقابل دخول وسط البلد
الصوباع ده السبب فيها
لأن أكيد هايعملوا ميدان صوباع إخناتون

ومش بعيد يبقى فيه أجازة رسمية قومية
ويبقى عيد التصبيع القومي المصري
وكمان تنزل علاوة سنوية فيه
صوباع لكل مواطن

إحنا دخلنا مرحلة جديدة.. في تاريخ مصر المعاصر
مرحلة إنتقالية.. فذة لولبية
مرحلة التصبيع الإخناتونية

وبجد وبدون تحيز.. مش عشان أنا مصرية يعني
بس إحنا نستحق وبجدارة وريادة.. لقب
شعب الصوباع الأعظم

شكر خاص لدكتور أشرف حمدي
على الكاركاتير اللي نزله النهاردة
وعرفني موضوع الصوباع

أحمد مهنى.. ليه؟؟

انا لا يهمني البرادعي.. ولا غيره
ولا الثورة الخضراء.. ولا حتى الحمراء

اللي قهرني.. هو اعتقال أحمد مهنى بالشكل ده؟؟
هو مش فيه حرية فكرية؟؟
وحرية ثقافية..
وحرية عقيدة
وحرية...............

كل يوم حرية منهم تموت قصاد عيني
هو فيه ايه يا ناس؟؟؟

هاقول ايه بس..
لا حول ولا قوة إلا بالله

واحدة صديقة قالت.. انهم اعتقل احمد
بدل كمال جبريال.. عشان محدش يقول ان
الحكومة ضد الكتاب المسحيين!!
طيب ليه اصلا مصادرة حرية الفكر؟؟

بصوا.. انا مابحبش البرادعي
ولا عايزاه يمسك حكم

بس كمان.. انا بشمئز من مصادرة الرأي
ما كل واحد حر في رأيه
ويعبر عنه بطريقته
ليه كده؟؟؟؟

:@

دامت لمين..؟!!

ازيكم كلكم.. اخباركم ايه؟؟
هو بوست عكننة انا عارفة..
بس مش عارفة بقى
احساس جويا ..
مخيف ..
مرعب ..
ومتعب جدا

الموت علينا حق.. اه طبعا
والموت هو الحقيقة الوحيدة في الدنيا

لكن الفراق بيكون صعب اوي..
ومتعب اوي كمان

كانت صديقة ليا..
ملاك على الارض زي ما بيقولوا

روحها خفيفة وجميلة..
طيبة.. هادية

كنت اول واحدة تعرف انها حامل..
جت تفرحني
كنت يومها متعكننة جدا.. ومكتئبة
فقالت:
هاقول خبر يفرحك.!
قولت لها:
قولي لما نشوف!
قالت:
انا حامل في شهرين :)

انا فرحت لها جدا لانها عايشة
بعيد عن اهلها
فالبيبي ده هيكون ونيس وحدتها
طول ما جوزها في الشغل

بعد شوية.. بدأت تحكي عن تعبها
والمها المستمرة
ونزلت القاهرة عند مامتها.. تكشف
واكتشفت ان القلب تعبان جدا
وماكنش ينفع اصلا حمل :(

تعبت اوي.. واتعذبت
اوي في الفترة ديه
كانت دايما تشكي من تعبها
وتقولي ادعيلي

كنت بدعي لها لانها تستاهل كل خير
كل ما الوقت يعدي كل ما بتتعب اكتر
لحد ما جت في يوم تقول انها تعبانة اوي

كانت قربت تولد
وطلبت اني اسامحها على اي حاجة
عملتها وزعلتني
وربنا يشهد اني مزعلتش منها ابدا

وانقطعت اخبارها فترة
وفجأة......جوزها دخل
قال ادعولها رنا في ذمة الله

رنا..
يمكن علاقتي بها كانت قايمة ع النت
منتدى ومدونة وماسنجر وفيسبوك

لكن حزني عليها
وحزن كل اللي يعرفها
بيفوق تخيل اي حد

ادعولها بالرحمة والمغفرة.
لانها تستاهل

ادعو للطفل اللي سابته
ان ربنا يحميه وجعله عوض عنها
ربنا يرحمك يا رنا.. يارب

وكمان خلونا نفتكر الناس
اللي مشيت وسابتنا
لكن لسه كلامهم معلم جوانا
وبنفتكر مدوناتهم

محمد فارس - الحياة أمل

هدى عبد المنعم - بهلولة

الفارس الملثم - ثرثرة تحت المطر

ربنا يرحمهم جميعا.. ويسكنهم فسيح جناته
تعالوا ندعولهم كلهم.. اكيد هايجي يوم
نحتاج فيه ناس تدعي لنا

سمحوني لاني رجعت
ببوست زي ده.. بس اصلها..
دامت لمين..؟!!

نهاية غير متوقعة لـــ2009

كل سنة وأنتم طيبين يا أجمل ناس عرفتها في حياتي
2009 أخيرا هاتنكشح من العالم.. كانت سنة عجب بجد
حصلي فيها حاجات كتير أوي وحشة.. الحمد لله ع كل شيء
لكن معرفتي بيكم.. كانت من أجمل الحاجات اللي حصلت

كنت متخيلة أن السنة ديه هاتفضل.. زرقة زي ما بدأت معايا
فاكرين الزرقان اللي كان هاجم عليا من يوم عيد ميلادي

بس حصل حاجتين في آخر أسبوع فيها.. فرحتي بيهم
تعوضني عن كل اللي حصلي طول شهورها وأيامها

أول حاجة.. الكتاب اللي هاتنزل ليا قصة فيه
وطبعا أنا بدأت كتابة بالنسبة للقصص في مارس بس
فالحمد لله طبعا.. أن بعد أقل من سنة اسمي يكون في معرض
الكتاب ده شيء بجد اسعدني جدا.
وميرسي لموقع نص الداعم ليا

تاني حاجة.. من كام يوم جالي كومنت على بوست
قديم بتاع التدوينة السودة.. لو تفتكروا.. عن غزة
وربنا يكرمه اثنى على البوست.. وانا رديت عليه
والله ما قريت رده بعد كده
بس لما دخلت لسوووو
وهو زعلان عشان اللي بيتسرق منه
فشيكت على اللي تم نسخه من مدونتي
وعملت بيهم سيرش

وإذ فجأة كده.. الاقي حاجة اصلا عمري
ما تخيلت انها تحصل ليا.. والله بجد.

لاقيت منتدى عامل ليا قسم كامل يناقش فيه مدونتي
القسم كله بوستات من مدونتي وبس.. بصراحة
انا طيرت من الفرحة.. فرحاااااااااااانة
منتدى أبو خضرة

يااااااااااااه بقى.. اصلا من 4 ايام قابلت واحد
ضاف ايميل المدونة.. وكلمته.. وفرحت اوي
ان فيه اصلا حد متابع كده مدونتي.. وفرحت موت
إنه حب التدوين عشان مدونتي
ومدونة د.ستيته وغادة عبد العال

واصلا اسمي مع الاتنين دول.. في حد
ذاته يطيرني من الفرح مكنتش متخيلة ابدا
ان حد يقارني بيهم.. وباسلوبهم

وانا بقوله .. انا عند وعدي ليك
والله ان شاء الله

وبعدين الاقي النهاردة قسم كامل في منتدى ليا
يااااااالهوي.. مش مصدقة وربنا لحد دلوقتي
بجد انا بشكر أبو خضرة.. من كل قلبي
انت غيرت فكرتي عن السنة كلها

يعني انهارده كنت ناوية والنية لله.. اعكنن :)
على كل المدونات الصديقة.. باحداث 2009
بس انت .. خلتني اغير خاااالص

أدعو لعم أبو خضرة.. بطولة العمر
الله يخليه ويبارك فيه.. رحمكم من بوست الآلام

ابو خضرة.. صاحبنا سووو الجميل كان بيشتكي
من الناس اللي بتاخد وماتقولش جابو منين

انا بقوله اهو.. ابو خضرة مثال حي
ان فيه ناس محترمة لدرجة منتخيلهاش
ناس تعرف يعني ايه ناس بتكتب كلمة
وقد ايه الكلمة بتكون غالية عليهم

بشكرك يا ابو خضرة
من معاميق قلبي :)

وهااااابي نيييو ييييييييير
يا مدونيييييييين

:))

جواز سال من نيني.. بااااااااطل

أول ما رجعت للتدوين.. كنت دخلت عملت كومنت

عند أحمد أبو العلا.. على بوست أم زغلول

هو سأل هل ممكن أم زغلول تاخد نوبل؟؟
أو حتى زغلول أبنها يبقى حد عدل في الدنيا؟؟

أنا قولت له.. ممكن تاخد نوبل في الفن أو الأدب

قياسا على اوباما.. لما خد نوبل للسلام

وطبعا كانت نوع من الدعابة.. لأن ام زغلول

ماتعرفش في حياتها غير جايزة
آريل آريل.. أوووه أوووه

بس بعد ما قريت اللي قريته.. واللي هاحكي لكم عليه ده

انا من موقعي هذا.. ومن منبر فتافيت

أعلنها للعالم.. بجد ام زغلول ممكن
تاخد نوبل يا رجالة

ههههههههههههه.. والله بجد ممكن

لأننا في زمن كل شيء فيه ممكن

طيب هاحكي وانتم احكموا .. ماشي

قريت على cnn اول امباح
قصة زواج شاب ياباني 27 سنة
الشاب اسمه سال.. والبنت اسمها نيني أنيغاساكي

سال اتعرف على نيني.. في سبتمبر اللي فات وعجبته
واللي عجبه فيها.. عنيها الواسعة
(وطبعا ده عقدة عشان ياباني.. وعيونه ضيقة)
ولبسها الجذاب.. هو حبها لدرجة
انه ما بيفارقهاش نوهائي نوهائي

بعد 3 شهور من الحب والغرام وهيااااااام
( والحب ولع في الدرة يا نيني :) )
قرر سال انه يتجوز نيني.. ويعمل فرحه
على شبكة الانترنت.. عشان العالم كله يحضر

لكن العقبة الوحيدة في الجوازة ديه.. مانتم عارفين
دايما الجواز بيكون فيه مشاكل
العائلات بقى والاتفاقات وكده

العقبة ايه بقى.. تخيلوا والنبي والنبي
العقبة ايه يا خوانا.. يا عاقلين
ان نيني شخصية كرتونية
ان ان .. تشششششششششش
ايوة زي ما قريتوا كده
نيني شخصية كرتونية

ديه صورة المحروسة نيني بجد

الموكوس سال.. جرب لعبة في شهر سبتمبر

وكانت اللعبة فيها شخصية نيني

اللي حبها بجنون وقرر الجواز منها

لا ده فعلا أتجوزوا.. وحضر حفل زواجهم

الآلف المدعوين.. على شبكة الانترنت

سال قال ايه بقى:
انا بحب نيني.. مش الجهاز اللي بلعب عليه
(لعبت عليك نفسك يا بعيد)
وعارف كويس ان جوازي منها
ماينفعش جسديا.. او قانونيا
( المعتوه عارف اهو.. انه جواز ما ينفعش)
لكن بحبها وقال كمان.. ان نيني افضل من الزوجة
البشرية على الأقل لما بتأخر عليها
ما بتزعلش مني وماتردش عليا
(ابن العبيطة هي بتحس اصلا)
ولو زعلت بتسامحني بسرعة
وكمان نيني معايا في كل مكان بيروحه
ومابتفارقنيش ثانية واحدة ابدا
لان سال بياخد جهازه
اللاب توب بتاعه.. في كل شوارع طوكيو
وفي اي مكان مهما ان كان

صدقتوا بقى؟؟.. ان ممكن أي حاجة تحصل؟؟
واللي خلا سال يتجوز نيني.. قادر يخلي

ام زغلول سيدة مجتمع من الطراز الأول

وبقدرة قادر .. تاخد جايزة نوبل

طيب سال ده.. هايعيش مع مراته ازاي؟؟
طيب لو خلفوا.. هايجيبوا ايه؟؟
انسان مكرتن.. ولا كرتون مأنس؟؟
ولا والنبي حارسه سال ده.. يبقى ابو كرتونة؟؟

طيب تفتكروا.. ان ده حل للشباب اللي
مش قادر يتجوز.. انه يتجوز أي انمي؟؟
يعني نقدر نقول.. وعلى اساس كلام سال
اتجوز شخصية كرتونية.. وعيش عيشة هنية؟؟

انا بفكر ان الستات تعمل مظاهرة
لا تبقى خيبة.. احنا لازم نحتج بجد
لا منلاقيش رجالة بعد كده نتجوزها
وكل واحد ياخد اللاب توب بتاعه في حضنه
واحنا نقعد كده زي قرد قطع كده؟؟

لا انا مش هاسكوت.. يلهووووي
جواز سال من نيني.. بااااطل
باااااااطل.. بااااااااطل

فتافيت.. من جديد

وحشتوني جدا.. كلكم كلكم.. والله كلكم

مش عارفة الدنيا أخدتني بعيد ليه عنكم.. وعن حاجات كتير بحبها

بس والله.. ماغبتم لحظة عن بالي.. وبتابع أغلب بوستاتكم

والفيسبوك.. ربطني بناس كتير من هنا وقوى علاقتي بيهم

بغض النظر عن الدومة اللي كنت ولسه فيها

قررت ارجع تاني للتدوين.. وملاقتش يوم أجمل من النهاردة
ارجع فيه.. واقولكم وحشتوني جدا

تصفيق حاد بقى
:))

طبعا النهارده..رأس السنة الهجرية
كل سنة وأنتم وأنا طيبين
وأمة محمد عامة.. بخير وسلام وبركة

ستيتة.. وحشتيني جدا.. وفرحت موت أنك أفتكرتيني في بوست العدية
وصدقني مكسبي هنا معاكم.. أغلى وأجمل من أي مكسب في أي مكان

تامر علي.. أكتر مدونة كنت متبعاها وقت الأنقطاع
وبوست عزازيل تحفة
واستفدت منه جدا.. وبجد أفتقد بشدة روحك الجميلة وخفة دمك

أحمد أو العلا.. يعني مش عارفة أقولك إيه.. كنت كل ما
ابقى متعكننة كفاية أني ادخل أقرا أي بوست عندك

عشان انسى أي حاجة معكنناني

إبراهيم العدوي.. بجد أنت ونعم الأخ.. دايما سباق بالخير


أبو العريف و المعتصم .. كنت بدخل من وقت للتاني أشوف أخباركم
وبجد أفتقد بشدة تعليقاتك اللي كنت بموت فيها

د. عرفة.. أيوشة.. تامر دياب.. إحساس لسه حي
إحساس طفلة.. موني الشريف.. حسام غانم.. سوووو
والله ما جسر الفيسبوك في إنه عرفني بيكم أكتر

Bondoka.. ghorBty.. عاشقه الرومانسيه.. عاشقة وغلبانة
assafo anaroze.. لؤلؤة.. Soul.o0o.Whisper..
Sweet Violet.. أحلام جوليا.. شباك موارب.. ريمان
لورانس العرب.. فشكول.. قيس بن الملووووح

اسلام الشربيني.. che.. كفاية طيبة.. بسنت صلاح
د. ياسر.. مامة مازن.. حسوباتيه.. مسدس صغير
ادم المصري.. امبارح كان عمري عشرين
لوجين ابو الدهب.. اقصوصة.. يوم جديد
وروح قلبي من جوه الفقيرة أم البنات


وحشتوووووني أوي بجد .. أوووووي
يارب بس ماكنش نسيت حد.. منكم ولو نسيت
اعذروني.. حكم السن بقى والشيخوخة
:))

انا جيت بس أقول وحشني أوي
وإني رجعت تاني للتدوين خلااااااص
ويارب تكونوا لسه فكرني