30 يونيو 2011

30- اختبار الحصول على،، عضوية القلة المندسة!!

:
:
ده البوست الأخير،،
في حملة التدوين اليومي،،
إختبار الحصول على عضوية،،
القلة المندسة،،،!

أولاً،، أختر الإجابة الصحيحة:

- وجه الشبه بين زين العابدين بن علي وحسني مبارك:
1- السعودية
2- الثلاث خطابات
3- نوع صبغة الشعر

- بـالعام الذي قتل فيه 1000 شهيد تم:
1- علاج مبارك على نفقة الدولة
2- ترشيح عناصر النظام المخلوع للرئاسة
3- نفخ عجلة الإنتاج

- سبب فرار آلاف السوريين لتركيا:
1- عمل الشوبينج
2- جولة سياحية
3- وَصْل صلة الرحم

- سبب بكاء تامر حسني بميدان التحرير:
1- انشغال الفتيات بالمظاهرة وعدم حدوث اغماء جماعي
2- برودة الطقس مما حال بينه وبين إظهار شعر صدره
3- دمــاغه كانت بتــاكله

- العمل الفني الأنسب لتوثيق 2011:
1- شرف الأستاذ شرف
2- شفيق يا راجل
3- رامي الإعتصامي

ثانيــًا،، أذكر تاريخ وأهداف ونتائج كلا مما يلي:
1- غزوة الصناديق
2- موقعة الجمل
3- غزوة ميكي ماوس

ثالثـًا،، أوجد وجه الشبه بين كلا مما يلي:
1- القذافي وتوفيق عكاشة
2- ميكي ماوس ونجيب ساويرس
3- الإعلامي العربي وأفلام الخيال العلمي


ربعـًا،، قوة الملاحظة:

(1)


أوجد ثلاث اختلافات بين الصورتين؟

(2)


أوجد ثلاث اختلافات بين الأمن والبلطجية؟

خامسـًا،، تاريخ:
- (شهداء 25 يناير،، ماتوا في أحداث يناير):
المناضل،، حمــادة هلال

1- علل،، موت شهداء 25 يناير بأحداث يناير؟
2- وما الفرق بين،، أحداث يناير وثورة يناير؟
3- أذكر مسمى،، لمن ماتوا بأحداث فبراير؟

- (هبطل السجاير،، وأكون إنسان جديد،،
ومن أول يناير،، خلاص هاشيل حديد):
نبوءة للمناضل،، شعبان عبد الرحيم

1- هبطل السجاير،، تشير إلى:
- أزمة الحشيش التي سبقت الثورة
- أزمة السجاير التي شاهدتها الثورة
- ارتفاع أسعار السجاير بعد الثورة
- كلمة لها دلالة خطيرة بالقاموس الماسوني

2- خلاص هاشيل حديد،، تشير إلى:
- متاريس ميدان التحرير
- سلاح الأمن المركزي الناري
- سلاح البلطجية الأبيض
- إشارة لعزل عز من أمانة الحزب الوطني

3- هكون إنسان جديد،، تشير إلى:
- إنسان ليبرالي
- إنسان إخواني
- إنسان سلفي
- إنسان أجندة خارجية

سادسـًا،، أذكر أهمية كلا مما يلي:
1- وجبات الكنتاكي بميدان التحرير
2- البونبوني بالثورة المضادة
3- تظغيط البط بالإنتخابات الرئاسية

:

كل من سينجح بهذا الاختبار سيحصل،، بالإضافة
لكارنيه جمعية القلة المندسة،، سيحصل على:
إقامة لمدة يومين (فول بورد) ببورتو طرة
بالإضافة إلى (خصم لمدة عــام)
على جميــع وجبات كنتاكي!




29 يونيو 2011

29- إلهــي أنــادي،،!!

:
:
ده البوست الـــ 29

في حملة التدوين اليومي،،
إلهــي ،، أنـــادي،،!!

عايــزة رأيكم بصراحة
لأن دي أول مرة أكتب النوع ده!


إلهي أنادي،، يا رب العباد
حبيبي وما للقلب خل ســـواك،،
أنادي بجوف ليل السكون،،
عسى القلب ينال اليوم رضــاك!!

أنادي إلهي برفع الكفوف
أنادي حبيبي بدمع العيون
فإني لهديـــك،، أتوق،، أتـــوق!!

إلهي أنادي،، يارب الوجود
غريق أنا،، بيــم الذنوب
ومدت له التوبـــــــة،، شراع
فتـُب عليَّ،، عسايا أتوب
وكن لي ضد الخطايا،، الحمى والدفاع!!

إلهي أنادي،، يارب السماء
كسبت الذنوب فزدت شقــــــــاء
ذنوب نسيت فيها،، إله رقيـــب
وبيني وبين التوبــة،، جبال الأهــــــواء
فاليوم أرجو من نـــورهديك طبيــب
فنورك دومـًا،، هُدى لمن عصاك،،
فألهمني نوراً،، لدرب الهنـــــاء!!

إلهي أنادي،،،،،
يـــــاربيَّ الحبيب
فوحدك بما يكن الفؤاد عليــــم
ووحدك لســر قلبي تصــون
ووحدك لدعاء الداعي مجيــب
ووحـــدك مَنْ لــه الــــروح تهــــــون!!

إلهــي حبيبي،، إلــهي الغـفور
أتيت اليــوم لبــابك منيـــب،،
ألتمس،، الهدى،، والرضا،، والقبول!!

:

29-6-2011

28 يونيو 2011

28- مسلمــون حــول العـالم،، الجزء الثالث!

:
:
ده البوست الــــ 28
في حملة التدوين اليومي،،
مسلمـــو زنجبـــار وتنزانيــا!!،،
أغلبية مهمشـة،، وأقلية شرسـة،،!!
:

تقع (زنجبار) شرق أفريقيا على المحيط الهندي، هي مجموعة من الجزر عددها حوالي 52 جزيرة، أكبرهم جزيرة (زنجبار) وجزيرة بمبا، وتبعد عن (تنزانيا) تنجانيقا سابقاً 36 كم، وكان اسمها (بَر الزنج)، وبعد كده بقى اسمها (زنجبار)،، وعدد سكانها حوالي مليون نسمة، 98% منهم مسلمون، والبقية مسيحيون وهندوس،، وأصول المسلمين - بالإضافة إلى الأصل الأفريقي- تعود إلى عمان وفارس والهند وباكستان، وهي دلوقتي جزء من الجمهورية الاتحادية اللي اسمها (تنزانيا) بعد ما احتلتها تنجانيقا في 12 يناير 1964م، وتم تغيير الاسم إلى (تنزانيا) اللي هو جمع ما بين الاسمين (زنجبار) وتنجانيقا،،!


كانت (زنجبار) أرض مسلمة من القرن الأول الهجري، عن طريق الهجرات العربية والشيرازية إلى شرق القارة الأفريقية في عهد الدولة الأموية،، حكمها العرب العمانيون حوالي ألف سنة،، وزادت قوتها وبقت مملكة إسلامية لها وزنها لما طردوا البرتغالين،، وتصدوا لحرب صلبية شعواء، وبعد كده بقت قبلة لهجرات عربية واسعة، من الجزيرة العربية واليمن، ده غير الآلاف من الهنود اللي اشتغلوا بالتجارة، وكانت (زنجبار) قوية جدا من الناحية الإقتصادية، لحد ما ربنا بلاها بالاحتلال البريطاني اللي مزق المملكة، ومهد السبيل لإنشاء جمهورية (تنزانيا) بعد ما تم ضم (زنجبار) -قسراً- مع منطقة تنجانيقا عام 1964،، وكانت مذبحة سجلها التاريخ في حق المسلمين على يد أحد القساوسة وأعوانه!،، ولكن الآثار العمرانية الاقتصادية في (زنجبار) ما زالت شاهدة على الأخوة الضاربة بجذورها في أعماق التاريخ بين الأرضين العمانية والزنجبارية الإسلاميتين،،!،، ده غير إن الوجود العربي في جزيرة (زنجبار)،، سبق ظهور الإسلام فيها أصلا،،!

المسلمين في (زنجبار) 98%،، ومع ذلك تم تهميشهم بشكل مجحف في كل مناحي الحياة،، ومحرومين من الوصول إلى أي منصب يكون له حق في صنع القرار،، حتى إن في سنة 2001 ورغم أن الأغلبية مسلمة تم تعيين وزير مسيحي لرئاسة الوزارة الخاصة بالشؤون الدستورية وهى اللي بتقوم بإدارة الإفتاء والأوقاف والمحاكم الإسلامية في (زنجبار‍)،،!!،، ده غير إن الشباب المسلم هناك محروم من فرص التعليم والمنح الدراسية والحياة الأكاديمية اللي بيتمتع بها الشباب المسيحين بلا حدود،،!


هناك اضطهاد قوي للعقيدة الإسلامية،، في عام 2001 برضو تم إعتقال الشيخ الإمام محمد الخامس،، من أحد المساجد بسبب إنه فسر الفرق بين العقيدة الإسلامية والمسيحية،، والفرق الجوهري بينهم،، من حيث إن الإسلام نفى الصلب عن سيدنا عيسى،، في وقت إن المسيحية بتأكد صلب السيد المسيح،، وكانت تهمته هي إهانة السيد المسيح لأنه نفى عنه الأولهية!!

وقامت ثورة من شباب (زنجبار) المسلمين احتجاجا على الحكومة التنزانية اللي بتسعى بكل طاقتها،، لمحو أي آثر إسلامي بالجزيرة،، وتم قتل منهم الآلاف ضربا بالرصاص واتسجن منهم كتير جدا،، ومع ذلك بيصروا ليومنا هذا على الإستقلال وعودة الهوية الإسلامية لــ (زنجبار) المسلمة،،!

المسلمين في (تنزانيا) ككل حوالي 75%،، وطبعا لا يختلف الحال فيها عن (زنجبار)،، لأن العلاقة بينهم علاقة الكل بالجزء،، وبيعاني مسلمين (تنزانيا) نفس معاناة الشعب الزنجباري،، الفقر الأمية التهميش،، ندرة المدارس الإسلامية،، يمكن الوضع تغير قليلا بعد ما تولى الرئيس (جاكايا كيكويتي)،، لأنه أول رئيس مسلم يمسك البلد،، رغم إن الأغلبية الساحقة فيها مسلمين،، لكن فضلت الأقلية هناك شرسة وذات أنياب،، ورافضين أي ظهور للإسلام في الجمهورية،، حتى إن (تنزانيا) بتشهد أقوى حملات التنصير في العالم على الإطلاق،، وده بسبب فقر المسلمين المضجع وأميتهم وندرة وجود المساجد أو المدارس الإسلامية،،!


هم هناك ناطقين اللغة السواحلية بالإضافة إلى اللغة المحلية وفي المصالح الحكومية الإنجليزية،، فبالتالي في صعوبة بالغة في تعلم تعاليم وشعائر الإسلام،، هناك ندرة كبيرة في أعداد المدارس الإسلامية اللي بتهتم بالعلوم الإسلامية، زي،، القرآن الكريم والسنة النبوية الشريفة، لأنها بتقوم على الدعم الذاتي،، وفقر المسلميين هناك مأثر جداً طبعا،، ده غير إن ممنوع بالمدارس الرسمية تدريس أي شيء إسلامي،، وواكب النقص ده نقص شديد في إعداد المعلمين القادرين على الوفاء بمتطلبات الدعوة الإسلامية، وكل ده أثر بصورة واضحة على درجة وعي المسلمين بدينه،،!

في نفس الوقت منظمات التنصير بتعمل بشكل رسمي تحت لواء الكنيسة الإنجيلية واسعة النفوذ هناك،، وبتطبع الكتاب المقدس وتعاليمه بكل اللغات نظراً لتوافر المال والسلطة والعلم لديهم،، وبيتم توزيعها على المناطق الإسلامية،، مع الضغط على وتر الجوع والفقر عندهم!!،، ومع ذلك وتطبيقاً لقول الله عز وجل في سورة الصف الكريمة (يُرِيدُونَ لِيُطْفِئُوا نُورَ اللَّهِ بِأَفْوَاهِهِمْ وَاللَّهُ مُتِمُّ نُورِهِ وَلَوْ كَرِهَ الْكَافِرُونَ)،، تمشي في شوارع (تنزانيا) تلاقي المشهد المألوف هو السيدات والفتيات المحجبات،، بيعملوا مدارس إسلامية من الطين والخشب،، عشان يقدروا يقاوموا خطر التنصير اللي هاجم البلاد،، فالمسيحية لم يكن لها أي وجود لا في (زنجبار) ولا (تنزانيا) ككل من 150 سنة،، ومع ظهورهم وتحالفهم مع الإحتلال البريطاني،، بقوا قوة ومع الوقت أصبحوا الأقلية الشرسة ذات النفوذ والسلطة والمال،،!!

من أسوء ما يحدث هناك إن المدن والمناطق المسلمة،، تعتبر مناطق نائية بدائية،، بلا مرافق لا ماية ولا صرف صحي ولا كهربا،، وده طبعا مش موجود في مناطق الأقلية المسيحية،، ممنوع دراسة المواد الدراسية الإسلامية في المدارس،، نادراً جداً تبوء مناصب حساسة للمسلمين حتى بعد تولي الرئيس المسلم!،، ممنوع منح أي طالب مسلم منحة دراسية أو إرساله بعثة للخارج!،، مصاريف المدارس هناك في العام الواحد حوالي 30 ألف شيلن،، والمسلمين أصلا مش لاقين ياكلوا،، فبالتالي نسبة المسلمين اللي مابيعرفوش يقروا خالص تخطت الـ 50% من عددهم،، ودي كارثة لأن النسبة دي غير واعية بتعاليم الإسلام بشكل سليم،، فسهل جدا وقوعها ضحايا لعمليات التنصير الشرسة والممنهجة،،!!



رغم إننا مش حاسين بيهم أصلاً،، إلا إنهم داعمين لكل القضايا الإسلامية،، وبيخرجوا دايماً في تظاهرات دعم للقضية الفلسطينية،، وأيام غزو العراق طلعوا بالآلاف ينددوا باللي بيحصل،، ولما بوش عمل زيارة لـ (تنزانيا) استقبلوه بمظاهرات شديدة قوية،، ولوحات مكتوب عليه غير مرحب بسارق النفط،،،!

ملسمين (تنزانيا) ككل محتاجين دعم مادي،، محتاجين علماء إسلامين ناطقين بالسواحلية،، محتاجين كتب إسلامية مترجمة للسواحلية،، محتاجين مصاحف مترجمة،، محتاجين دعم كل الدول الإسلامية،، لأن الأقلية الشرسة هناك واقفة عائق حتى ضد إنضمام (تنزانيا) لدول المؤتمر الإسلامي!!،، كمان مسلمين (زنجبار) طبعا ده كله محتاجينه لكن كمان بشكل خاص ليهم علينا حق الدعاء ،، من أجل استقلالهم وعودة مملكة (زنجبار) الإسلامية العظيمة ذات السيادة الإسلامية الحرة،، والقوة الإقتصادية السابقة،،!!



27 يونيو 2011

27- سوسو يا سوسو،، هتموتي يا سوسو!

:
:
ده البوست الــــ 27
في حملة التدوين اليومي،،
سوسو يا سوسو،، يا سوسو،،!
هتمـوتي يـا سوسو،،!

نظراً لأني خفيفة الظل وأموت في التهريج
وبما إن اليومين دول،، كل ما حد يتزنق يقول
أصلي كنت بهرج،، يا أخوانا عاتشي!
قررت أهــرج أنا كمــان جت عليا!


أرمي خط موبينيل،،
وخلي سوسو تسرح بمناديل!

بطل تقرا المصري اليوم،،
وخلي عنين سوسو تنسى النوم!

قطع عقد النت من لينك،،
وخلى سوسو تسرح بحزمتين فجل!

وطظ كبيرة في أوراسكوم،،
الملتحين والمنتقبات جزمتهم فوق راسكم!!

أون تي في ما تشغلهاش فـ التليفزيون،،
وأتفرج بدلها على سبيس تـون!

سيبك من حزب المصريين الأحرار،،
وخلي سوسو تعمل حزب لأكلة الفشــار!

مــع شبــكة أم نبيــــل،،
بيض من قلبـك!!

شبــكة أم نبيـــل،،
الشبكة الأولى اللي هاتخربها مصر!



كفاية تهريج بقى،، يلا نهزر
لا خلاص،، هاتكلم بجـد!

لما الشيخ يعقوب،، عمل غزوة الصناديق
وهو أصلا بقاله 1400 سنة مايعرفش حاجة عن السياسة
الدنيا قامت،، وقالوا عليه كلام كتير
وأنا كمان قومت عليه،، وقولت ما في الخمر!
خاصة لما بمنتهى اللامبالاة قال،،
كنت بهرج!،، قشــدة كده،،

بس ألتمست له الأعذار،، ليــه؟
لأنه مالوش في السياسة،، وخريج دبلوم
يعني هو فقيه في الدين،، لكن على قده في الباقي

لكن لما يطلع واحد من النخبة،، ومهندس
قد الدنيا،، ويشتري نص مصر بفلوسه
وليبرالي بقى،، من بتاع الحرية
يطلع يهزء بالإسلام،، بصورة وقحة
ويقول أصلي كنـــت،، بهــــرج!!
يبقى،، تيييت بصوت عالي!

والتيييت الأعلى ،، للإعلام بتاعنا
اللي عمل حفلة على غزوة الصناديق،،
وسـوكتم بـوكتم،، ولا نفس حتى
عن غزوة ميكي ماوس!

سوسو،، أتنشين
إسـلامي،، وحجابي،،
ونقاب أمي،، ودقن أبويا،،
خــط أحمــر يا سوسو،،،،!!!!

26 يونيو 2011

26- أقر بندمي الشديد،، تغيير وجهة نظـــر!!

:
:

ده البوست الــــ 26
في حملة التدوين اليومي،،
نـــدم وتغييــر وجهـة نــــظر!!،،
كان له صورة،، ومسحتـها!!

البوست طويل،، ولو بتزهق
أقفله وريح نفسك
:))

من فترة كنت في زيارة لمدونة أخي الفاضل أ، ماجد القاضي،، وكان البوست عن حقيقة عبد الناصر،، ووقتها أنا أشدت بالبوست جداً،، فرد ساخراً أن أكيد لو كتب عن السادات مش هارفعله القبعة أبداً،، ورديت أن بوست حقيقة السادات عليا أنا،، ده أنا عايشة ربع قرن مخدوعة!!،، خلوني أبدأ الحكاية من الأول،،

من حوالي 6 شهور يمكن أكتر شوية،، أخ عزيز وفاضل،، رشحلي عريس (م) وزي ما بيقولوا الجواب بيبان من عنوانه،، فلأن اللي رشح لي الشخص ده على دين وخلق وثقافة (ولا أذكي على الله أحداً)،، كان العريس على نفس الشكل،، المهم في أخر قعدة لنا سوا،، في وسط الكلام جت سيرة السادات،، وقولت وبراءة الأطفال ها تبوظ من عيوني،، إني بحب السادات جداً!! (فيها عاجة دي)،، وإذ فجأتن ألاقي أخته الكبيرة طلعت مرة واحدة بنظرة إشمئزاز وبصوت،، عالي،، حاد،، غاضب،، رنان،، استفزني جداً وقالت (أتفضل يـا (م) أديها طلعت بتحب السادات أهو!!)،، أنا اتخضيت وراجعت كلامي في دماغي،، أنا لا قولت إني عليا قضية آداب،، ولا قولت إن ماما رقاصة،، ولا حتى قولت أن بابا بيضرب بانجو!!،، عشان يبقى ردها لسان حاله بيقول،، أتفضل شيل مجايبك يا أستاذ!!،، المهم إني وقتها (بعيد عنكم جميعـًا) نظرت لها شذراً،، وطبعا النظرة كانت قاتلة كالعادة،، وموضوع السادات أتقفل خلال دقيقة،، وما لفتتش وشها ليا تاني ولا كلمتني كلمة واحدة لحد ما مشيوا،، وفي نفس ذات الوقت الجوازة باظت!



بعدها بحوالي أسبوعين أخت عزيزة وفاضلة،، رشحت ليا عريس (ن)،، وكان برضو على قدر من الثقافة والعلم،، ومعرفش ليه وأنا قاعدة معاه مخي زقزق ولساني كلني قومت فاتحة سيرة السادات (بقت عقدة بقى ربنا يسامحها)،، وكانت القاعدة دي الأخيرة برضو (تقريبا سيرة السادات فقر عليا ما بتخليش عرسان تعيشلي)،، المهم إنه أشاد بيه جداً،، وقال نفس اللي كنت بقوله عليه،، الرئيس المؤمن،، قاهر إسرائيل،، رافع راس مصر بين الأقطار الشقيقة والغير شقيقة،،، إلخ!!،، قولت طيب قشطة مهو السادات طلع بيس أخر حاجة،، لكن على حين غرة قال بلسانه إنه،، عضو فعال في الحزب الوطني ويعشق مبارك كمان!!،، وده كان سبب قوي إني أقتله كما قـُتلت شجرة الدر،، مش بس أفركش أم دي جوازة!

في الوقت ده حسيت باختلال قوي جداً جوايا،، أزاي واحد إسلامي (م)،، ويكون من كارهي ومحتقري الرئيس المؤمن!!،، وفي نفس الوقت واحد تاني عضو في الحزن الوثني (ن)،، ويكون بيحبه وشايفه بطل؟؟!!،، وقتها شخصية بثق فيها قالت،، (بلاش تدوري على حقيقته خلي حاجة في تاريخ مصر مشرفة في نظرك وتفخري بيها!!)،، كلامها وجعني وخوفني إنه فعلا يطلع وحش،، مهو زي ما أنصار عبد الناصر شايفينه زعيم الأمة وأنا شايفاه فقاعة هواء،، وزي ما أنصار مبارك شايفينه الحكيم بطل الحرب والسلام وأنا شايفاه الخاين واكل شعبه وناسه،، ممكن السادات يطلع كده برضو،، ويبقى رؤساء مصر كلهم بوسة كبيرة وحضن كبير!!،، وأحط على راسي طرحة سودة وأصوت!!



لكن فجأة جت ثورة يناير،، وما بقتش محتاجة أشيل وهم ممكن يطلع صح أو يطلع غلط عشان أفخر بيه،، إذا كنت دلوقتي فخورة بنفسي مش بس فخورة ببلدي اللي غيرت الواقع!!،، وجه يوم التنحي اللي بيصادف يوم خلع شاه إيران،، وكان ده أول قفا أخده،، ماكنتش أعرف أي حاجة عن ثورة إيران لكن القدر خلاني أعرف عنها كل حاجة بالصدفة دي،، شاه إيران ده كان فاسد ومنيل بستين نيلة على دماغه،، طيب ليه السادات عمل معاه نفس الموقف المشين اللي عمله ملك السعودية مع المخلوعين؟!،، ليه الرئيس المؤمن يستضيف ويحمي الشاه الظالم الفاسد؟؟،، ليه أستفز شعب طالب بالحرية وقوله أنا بقى هاحمي اللي طلع عين أهلكم واستضيفه في مصر بعد خلعه؟!،، أعتقد إن المبادئ ما بتتجزئش أصلاً!!،، وكانت أول نقطة سودة ليه عندي!

بدأ بعد كده موضوع المرحوم الفريق الشاذلي،، يوضح ويظهر والحقيقة كاملة تنجلي، ولولا إن أقسمت قسم غليظ إني ما جبش سيرة الجيش المصري في المدونة خالص،، كنت قولت كتير في الموضوع ده لكن باختصار شديد جداً،، الشاذلي ما قصرش أبداً ولو السادات كان سمع كلامه،، لا كان هايبقى فيه ثغرة ولا حادثة 14 أكتوبر ولا حتى كامب ديفيد،، لكن نقول إيه بقى؟!،، وهنا وضحت أوي ديموقراطية السادات اللي بأنياب،، لما عمل للشاذلي إقصاء عشان خالفه الرأي،، كالعادة السياسة والعسكرية ما بيتفقوش كتير،، لكن الإقصاء والتضليل وتبديل الحقائق مالهمش ملة،، لا سياسية ولا عسكرية، دول سمات شخصية!

بعدها كرامتي نقحت عليا جداً،، (لاع مش هافضل عايمة على ماية البطيخ) لازم أشوف الحقيقة،، ووقع بقى تحت إيدي كتاب -خريف الغضب- لحسنين هيكل!،، وده بقى لا قفا ولا حتى شلوط،، ده كان علقة موت رجعتلي عقلي فعلاً!!،، خليني أقتبس مقطفات لاقتها مكتوبة في سايت،، عشان مش قادرة أنقل من البي دي إف،، الاقتباسات من صفحة 312 إلى صفحة 318،، هدايا السادات للحلفاء والأصدقاء!!،،:

- في فبراير ومارس 1971 قدم الرئيس السادات هديتين،، واحدة للرئيس تيتو وأخرى للرئيس بريجينيف،، كانت هدية تيتو عبارة عن تمثال واقف للإله أوزوريس ارتفاعه 48 سم،، عثر عليه بحفائر بنى سويف،، وكانت هدية الرئيس بريجنيف تمثالاً جالساً للإلهة إيزيس تقوم بإرضاع الطفل حورس،، ارتفاعه 22 سم،،!

- عقد من الخرز السكري من الإميثيت اللازوردي وفي منتصفه تميمة على هيئة حورس الطفل،، هدية لإمبراطورة إيران،، بناء على إشارة تليفونية،،!

- تمثال من البرونز للطائر أيبيس،، هدية لشاه إيران،، بناء على إشارة تليفونية،،
!

- إناء من المرمر،، هدية لأردشير زاهدي زوج ابنة إمبراطور إيران،، بناء على إشارة تليفونية،،!

- تمثال من البرونز للطائر أيبيس واقف على قاعدة خشبية،، هدية للدكتور هنرى كيسنجر،، بناء على مكالمة تليفونية،،!

- عقد من الخرز برميلي الشكل كل خرزتين متماسكتان والخرز بالتبادل،، خرزتان من الفلسبار،، وخرزتان من الذهب،، وخرزتان من العقيق،، وخرزتان من أحجار ثمينة زرقاء،، عدد الخرزات الذهبية 23 خرزة،، طول العقد 72 سم ،، قدم هدية لقرينة الرئيس ريتشارد نيكسون،، بناء على إشارة تليفونية،،!

- إناء من المرمر،، هدية للمليونير اليوناني أرسطوطل أوناسيس،، بناء على إشارة تليفونية،،!

- تمثال جالس للإلهة إيزيس من البرونز عيونه مطعمة بالأحجار الكريمة،، هدية للرئيس ريتشارد نيكسون،، بناء على إشارة تليفونية،،!

- تمثال لأيبيس،، جسم التمثال من خشب والرأس والذيل والساقان من البرونز،، ارتفاع 34 سم،، قدم هدية للرئيس جيسكار ديستان،، بناء على إشارة تليفونية،،!

- إناء من المرمر من عصر الملك زوسر ارتفاعه 77 سم،، هدية لمؤسسة كيري فى واشنطن،، بناء على إشارة تليفونية،،!

- عقد خرز مستدير الشكل تتوسطه حليه على شكل رمانة،، مصنوع من الذهب وحبات العقد من أحجار العقيق والأميثيست والفيروز،، طوله 65 سم ،، لم تذكر السجلات اسم المهدى إليه وإنما اكتفى بإشارة تقول "لإهدائه بمناسبة زيارة الرئيس لأمريكا و بريطانيا"،،!


وطبعا العهدة على حسنين هيكل،، وهو أصلاً موثق كل كلمة بالمستندات الرسمية،، ساعة ما قريت الكتاب ده بقى،، ضغطي وطي جداً،، ودخلت في موجة إكتئاب أكتر من أسبوع!!،، إيه ده،، إيه الفساد ده؟!،، هي آثار مصر بتتوزع نقطة طهور وولادة في العالم كله؟!،، وقد كده أنا غبية وساذجة؟!،، تصدقوا بالله إني مودي أتغير تاني دلوقتي بعد ما أفتكرت!!،، حسبي الله ونعم الوكيل،، المهم قبل ما أكتئب تاني،، جملة السادات اللي بتعيد وتزيد فيها الجزيرة،، بتاعة (أولادي المغـرر بيهم!!)،، لما سمعتها بعد ما قريت الكتاب ده حسيت إني بسمع عيال أجندات خارجية بياكلوا كنتاكي!!،، لو غضيت الطرف عن باقي بلاوي الكتاب،، ومر الحقيقة اللي عرفتها على كبر،، فكفاية جداً اللي كتبته ده،، عشان أشيل صورة السادات من بانر المدونة،، وأتحاكم كمان بتهمة الغباء السياسي!

25 يونيو 2011

25- جريمة قتل بسبب عمر أفندي،، إنها البداية!!

:
:
ده البوست 25
في حملة التدوين اليومي،،!
جريمة قتل بسبب عمر أفندي،،!!
إنها مجـــرد بــداية،،!!


السيد
خرج من السجن،، بعد سنين طويلة بسبب سرقة بالإكراه،، تاب وقرر يبدأ من جديد،، لف على كل المصانع،، المطاعم،، المحلات،، الأفران،، مافيش حد عايز يشغل عنده سوابق!!،، بس هو صمم على الحلال،، جاب عربية خشب صغيرة،، وحط عليها شوية لعب أطفال ووقف قصاد عمر أفندي،، وقال ياكل لقمة حلال بعرق جبينه!

مرفت
كانت رقاصة في الأفراح العشوائية، كانت بتكسب دهب بس اللي جاي رايح،، فلوس حرام بقى ومتعفرتة،، سمعت مرة شيخ على قناة الرحمة بيقول إن الرقاصة جسمها هايبقى جسم كلب يوم القيامة خافت،، تابت وحلفت ما ترقص تاني،، وجابت عربية خشب صغير،، حطت عليها شوية طرح ومعاصم ودبابيس حجاب،، ووقفت قصاد عمر أفندي،، وقالت تعيش وتموت مستورة بالحلال!

علاء
معاه دبلوم تجارة،، أبوه عجز ورقد من كتر ما داق المر لحد ما علمه،، عشان يشيل عنه الحمل بقى،، لف على كل الأبواب مافيش فايدة،، كلها مقفلة ومافيش شغل له،، بس هو في رقبته كوم لحم،، أمه وأبوه المريض،، وأخواته اللي بيتعلموا،، ضاقت الدنيا في وشه،، جاب عربية خشب صغيرة وحط عليها شوية ملابس داخلية،، ووقف قصاد عمر أفندي،، وقال أهم قرشين حلال يغنوا عن السؤال!

صابر
أبوه كان تاجر قماش كبير،، بس جار عليه الزمن وخسر فلوسه كلها في حريق،، ومات بحسرته وساب لصابر،، أمه وأخواته البنات،، مدارس وجهاز،، وديون تهد جبال،، مايعرفش غير التجارة،، جاب عربية خشب صغيرة،، حط عليها كام توب قماش،،
ووقف قصاد عمر أفندي،، وقال أهو يبدأ الطريق من البداية!

سعاد
جوزها عامل في مصنع،، الماكينة قطعت أيده،، وبقى عاجز وحمل بعد ما كان كسيب،، عندها 3 بنات عرايس،، خافت عليهم من الحوجة والعوزة يمشوا في طريق بطال،، أخدت التعويض،، وجابت عربية خشب صغيرة،، وحاطت عليها شوية لبس أطفال،،
ووقفت قصاد عمر أفندي،، أهي تصرف على البيت،، وتستر بناتها من ولاد الحرام!

رزق وحسان
طلبة في كلية الحقوق،، ولاد خال ومالهومش إلا بعض،، ياما داقوا الذل عشان أيتام،، ومر الصدقة يقطم الوسط،،، عانوا كتير لحد ما حوشوا شوية فلوس وهم في ثانوي،، جابوا عربية خشب صغيرة،، وحطوا عليها شوية ورد وفازات،،
ووقفوا قصاد عمر أفندي،، وأهي حفظت كرامتهم من مر اليتم،، وصرفت على تعليمهم وشالت عنهم الذل!

دي كلها حكايات خيالية
،، لكنها واقعية جدا
صحيح أنا معرفش حد من اللي بحكي عنهم دول
بس عارفة كام أسرة في الزقازيق،، بيتها مفتوح
من عربية خشب صغيرة عليها شوية حاجات،، قصاد عمر أفندي
يوم الخميس،، حصلت حملة نضافة وشالوا كل البياعين اللي هناك
أنا مش معترضة على نضافة البلد،،
بس الناس دي هاتعمل إيه؟؟!

أكتر من 200 بائع جائل،، أتقفل باب رزقهم
كام بوق جاع بقى،، كام بيت هايتخرب!!
طيب الناس دي،، كان عندها دخل بيجي من العربيات
ولو كان حتى 10 جنيه،، النهاردة مافيش،، الدخل صفر!!
طيب دول يسرقوا ولا يقتلوا،،
ولا متوقعين إيه؟؟

بصراحة رد الفعل كان أسرع من الخيال!!
ساعة صلاة الجمعة،، محل دهب اتسرق،، ودبحــوا صاحبه
في عز الضهر،، يعني لا جيش يهم ولا شرطة تلم!
والجريمة كانت بشكل باين جدا،، إنها انتقام من الأمن في الشرقية
يعني أنتم خربتوا بيوتنا،، وقفلتوا باب الرزق الحلال
خلاص نقضيها حرام،، ونشوف مين نفسه أطول!

أنا مش مع إني أسرق وأقتل عشان أكل،، لكن
كمان مش مع إني أشرد في يوم واحد،، أكتر من 200 أسرة
طيب ما الزقازيق مليانة أراضي فاضية،، ما الحكومة
تجيب البياعين وصاحب الأرض،، وأنت يا صاحب الأرض
هاتاخد من البياعين 10 جنيه إيجار لليوم الواحد،، وكده
البياع يلاقي لقمة عيش،، وصاحب الأرض يستفاد
بدل ماهي فاضية،، أهي بتجيب فلوس،،
وبرضو ملكه عادي!!!

لكن أقفل بيوت ناس،، نصهم سوابق وتابوا!!
وأتخيل إن الحياة،، هاتبقى فلة شمعة منورة؟؟!
طيب تيجي الزاي،،!!،، ده في عز الإنفلات الأمني
مافيش محل دهب واحد أتهاجم في الزقازيق!
يعني دي جرمية،، للإنتقام،، بتقول
دي مجرد بداية،، للدم!

:

مافيش نت عندي
داخلة من بره البيت أنزل البوست!!

24 يونيو 2011

24- يعني إيه كــوك زيــرو؟؟!

:
:
ده البوست 24
في حملة التدوين اليومي،،!
يعني إيــه كــوك زيــرو،،؟!
وحـــــدث هــام،،،!


يعني تونس تعمل ثورة ضد نظام
كاره للإسلام،، وبعد ما يسقطوه،، الأحزاب
كلها تعمل تكتل ضد التيار الإسلامي!

يعني مصر تعمل ثورة،،، ضد نظام ديكتاتوري
وبعد إسقاطه،،، مصر يبقى فيها
85 مليون ديكتـــاتور
!

يعني الدنيا تمطر في سوريا،، النظام يقولك
الشعب مش طالع مظاهرات،، ده طالع يفرح بالمطرة
وتاني أسبوع تمطر برضو،، النظام يقولك
المطرة دي غضب من ربنا على الشعب!

يعني البحريين تقوم فيها ثورة،، ويتقتل مدنيين
ويتحكم بالإعدام على قرايب المقتولين!

يعني سوريا تدخل بالجيش بتاعها،، تدك شعبها
قال بهدف إنها بتحـارب السلفيين الراديكالين
وينشق ضباط مسيحيين عن الجيش!

يعني مصر تسقط نظام،، فاسد
ويترشح نائب الرئيس،،، ورئيس وزراءه
ويكون لهم أنصــــار كمان!

يعني الجمل،، مصر كلها تقول يمشي
ولما يحن على أبونا ويستقيل،، الجيش يحلف
يمين طلاق تلاتة مهو ماشي!!!!

يعني المصابين من ثوار مصر،، لسه ما تعلجوش
والمخلوع ينعم بعلاج فايف ستارز،، بشرم الشيخ!!
لا وإيه كلمة مخلوع بتنرفزهم،،!!
خلاص خليها السيد الرئيس المخلوع،،!

يعني معمر القذافي،، بيتهم النيتو بجرائم الحرب
عشان موت بالغلط 15 مدني بطرابلس،، لكن هو
قاتل نص شعبه بالقنابل العنقودية المحرمة دوليا!!!،،
يبقى الأخ العقيد قائد الثورة الخضراء!!

يعني سوريا ما ضربتش طلقة نار واحدة
في الجولان يجي من نص قرن،، وخلصت دلوقتي
كل قذائفها ثقلية وخفيفة،، وهي بتضرب وتقتل
في شعبها الأعزل المسالم،، اللي بيطالب بالحرية!

يعني مصر تهدي جامعة الدول العربية،، العـربي
في ربع ساعة،، وتمسك فــ الجمل!!

يعني مرتضى منصور يتحبس عشان فلول
ويرشح نفسه للرئاسة،، وبرنامجه على 4 سيديهــات!

يعني اليمن تعمل ثورة تدفع تمنها دم،، ضد الصالح
وتفرح إنه غار في ستين داهيـــة،، وتطالب
بانتقال سلمي للسلطة،، يقوم النائب يقول
لا لما يرجع الصالح الأول!!!

يعني سوزان مبارك تقول،، هاتنــازل عن كل ممتلكاتي
وتطلع الفلوس تبرعات،، والقصر ملك الشعب!

يعني الليبرالية يكون معناها الحرية،،
وحريتك الشخصية،، تقف عند حرية الآخرين
وتلاقي ساويرس بيتطاول باسم الهــزار
على حرية المنتقبات والملتحين!!!

يعني سوريا بتقول إنها بتحارب،، الأرهابين
السلفيين المندسيين المسلحيــــن،، ويكون بين الشهداء
سيد شهداء سوريا،، حمزة الخطيب 13 سنة!!

يعني مصر تعمل ثورة،، وتطالب بالمحاكمة مبارك وولاده
ومحـــامي مبارك،، تكون تصريحـاته كالتالي:
مبارك أول مؤيــدي ثورة التغيير،،!
جمال من مشجعي حركـــة 6 أبريل،،!
علاء من محبي جمـــاعة الإخوان المسلمين،،!
ومش بعيد يطلع ميدان التحرير فــ الأخر،،،
معقل الثورة المضــادة
!!

يعني الشعب في سوريا يهاجر على تركيا
من كتر وحشية الجيش ضده،، والنظام يقولك
العشرة آلاف دول،، رايحين يزوروا أقاربهم!!!

يعني أمريكا تدعم الأنظمة الفاشية طول السنين اللي فاتت
والنهاردة لما الشعب كسب،، بقت خلاص
بتدعم إرادة الشعوب،، والديمقراطية!!


:

حـــدث هــــام،،
يـــــا معشــر المــدونيين!!


أضغط هنا
ده جروب على الفيس لرواية
(( نحن الماضي،، من أدب الخيال العلمي ))
للكاتب الأخ العزيز،، أ، ماجد القاضي
لايك بقى وشير،، الرواية هاتنزل الشهر الجاي

إن شاء المولى تعالى!

23- مــــرآة،،،!

:
:
ده البوست 23
في حملة التدوين اليومي،،!
قصـة قصيرة جـداً،،!
مـــــرآة،،،!


كلما نظرت بمرآتها،،، كلما أعتلت قمم الغرور،،،
وأيقنت أن عرشها على ملك الجمال خــالد،،،
وبرغم عشقها لتلك المرآة،،، إلا أنها حطمتها اليـوم،،،
لقد قررت شراء غيرها،،، جـديـدة،،،
بــــدون تجعيـــد!!
:

23 يونيو 2011

22- صــــورة،،، وتعلــــق!!

:
:

ده البوست 22
في حملة التدوين اليومي،،!
صــــورة،،، وتعلــــيق،،!
الصورة بريشة الفنان التشكيلي
خــــالد فــــرج!



وحــده طيفــك،،، شمســًا لا تغيــب
بين ظلمــات الليل،،، أمــلاً لا يخيــب

بين ثنايــا فؤاد محب،،، للصعاب لا يهيــب

يرجو الزمـــان بسؤال،،، لعلــــه يجيــب

ألا يــأتي يوم،،، تتبـــاعد فيــه الجـــدران

لتسكــن شمســك،،، ذاك الفــراغ الرحيــب
؟!


:
23-5-2011
:



21 يونيو 2011

21- عطـــر المــوت،،!

:
:

ده البوست الــــ21
في حملة التدوين اليومي،،!
عطــر المــــــوت،،!
قصـة قصيـــرة!




وقفت والحيرة تتلاعب برأسها، ترى أي عطر تختار؟!.. أمسكت بتلك الزجاجة الحمراء، تفحصتها وأعادتها لمكانها أعلى ذاك الرف؛ فليس لديها أي رغبة بأن تكون ليلتها بنكهة التوت البري..!، داعبت بأناملها الحانية خصلات حريرها الأسود المنسدل على أغلب جسدها، وعادت تستكشف كل العطور، وما أكثر ما تملك منها!!، أخيراً وجدت ما تريد.. هذه الزجاجة!، فتحتها وقطرت سائلها بمغطسها الرحيب، ومزجته بمائه الدافىء حتى امتلئ برغوة كثيفة وامتلئت أرجاء المكان برائحة المسك والصندل!!، لملمت حريرها الطويل ببعض مشابك الشعر، وغطست بنهرها العطر، وراحت تعبث كالأطفال بالماء... فأمطرت أرضية المكان بالرغوة الدافئة... كم تعشق أن تنهي يومها المتوتر بمثل هذا الحمام!!، حتى أنها تنفق الكثير من الوقت لتفرغ منه، كما تنفق الكثير من المال على اقتناء عطورها الفواحة!.

هنا على باب غرفتها تقف بخوف، تتقدم خطوة وتتراجع ثلاث، هي لا تريد أن تستسلم له، ولكنه آت لا مفر!!،.. فكرت لثوان بأن ترجع لأحضان عطرها الدافئ حتى الصباح، ثم قررت أن تقبع بسريرها، فلن يجدي الهروب من معركة الليل المحتملة، إن كانت حرب النهار أكيـدة لا محال!!، داهمها النعاس وكلما أطبقت جفونها تعود لتفتحها بسرعة، ولكن تلك المرة أغلقتها ولم تقوى على الفتح ثانية..!، غرقت بنوم عميق هادىء، حتى جاء هو بنفس المكان.. ونفس النظرة، بنفس الإصرار.. ونفس الشوق والرغبة!!..، حاولت أن تستيقظ ولكن كل أبواب الرجوع مغلقة بأمر السلطان!.

بدأت المعركة.. راح يلاحقها بسهامه القاتلة؛ التي تدغدغ إحساسها وتضعف قواها.. فتقاوم بكل صمود، تخشى أن يلمسها فتخر مستسلمة له!!، فرت بعيداً عنه.. فأمسك بأطراف حريرها المتطاير خلفها، آه.. فكم تلعن ذاك الشعر الطويل!!؛ جذبها له، وصوب نظراته الساحرة لها، كماء عذب يجري بأرض عطشى ملئتها شقوق الظمأ، فأبدل صلابتها لين...!!، رفع كفيها الناعمين له وراح يلثم أناملها، شعرت بدفء أنفاسه؛ فسحبت يدها بسرعة ودفعته بعيداً عنها، وأخيرا استطاعت الإستيقاظ!، تنهدت مبتسمة؛ كمحارب منتصر أنهكه وطيس المعركة!.

بأقل من ساعة كانت قد انتهت من هندامها، وأصبحت بطريقها للعمل، هنا على باب المكتب تقف بخوف، تتقدم خطوة وتتراجع ثلاث!!، أخذت نفسـًا عميقـاً إستعداداً لمعركة نهارية جديدة معه!!، دخلت متجاهلة وجوده، وجلست وكأنها ستبدأ بمهامها..، فعندما استلمت عملها بهذه الشركة منذ قرابة العام، كان هذا المكتب لها وحدها، وكان الوقت يمر ثقيلاً مملاً، وكأن الوحدة أقسمت بألا تفارقها أينما وجدت!، حتى أخبرها صاحب العمل بأن هناك زميل سيشاركها أياه، فرحت ولم تبدي أي استياء، لعله يقتل ذاك الملل الرتيب، ولم تتوقع ولو لثانية أن يكون هو سبب شقائها ليلاً نهاراً!!، عندما أتى ليستلم عمله كان خجولاً للغاية، ويبدو عليه الالتزام.. وأطمئنت له عندما عرفت إنه متزوج وأباً لثلاثة أطفال، ولكن سرعان ما اختفى الخجل، وتبدد الالتزام، وتلاشت الطمئنينة من قلبها.. بمجرد أن وصلت له تلك المعلومة، أن هذه الساحرة المثيرة التي تشاركه المكتب، مطلقة منذ خمسة أعوام، فبدأت المأساة!!.

لم ترفع عيونها من على سطح مكتبها.. إلا عندما وضع عامل -البوفيه- فنجان قهوتها الصباحية، ليقع نظرها عليه.. يصوب نظراته الساحرة لها، تخترق ملابسها، توخز جسدها، فتؤلمهــا..!، ارتبكت وتوترت ككل يوم، فلم تعد تملك المقدرة على التركيز بعملها، حتى ذلك المشروع الهام والعاجل، ظل حبيس الأدراج منذ أسبوع ولم تبدأ به بعد!، وزاد التوتر عندما صفعها عطره المثير قبل أن يقترب منها ليبلغها أن صاحب العمل قرر أن يجتمع بكل مهندسي الشركة بعد ساعة..!، ولم تكن هناك حصيلة لهذا الاجتماع إلا مكافئة له على نشاطه بيومين أجازة، وتوبيخها بسبب تأخير رسومات المشروع، والتأكيد عليها إن لم تسلمها خلال ثماني وأربعين ساعة كحد أقصى سيُتخذ معها الإجراءات اللازمة!.

ورغم غضبها من مكافئة المتسبب في تقصيرها، إلا أنها مرتاحة كون هناك ما يجبرها على التركيز وبنفس الوقت يحميها منه ومن معاركه المميتة، التي قد لا تقوى عليها بعد ذلك!، ومرت تلك الساعات الثماني والأربعون، مابين رسومات المشروع، وأحضان عطورها الدافئة بجلسات استجمامها اليومية!، لا نوم.. لا معارك.. وتستعين بالقهوة على المواصلة حتى تنهي المهمة.. ولكنها لم تتمكن من إنهاء الرسم بعد كل هذا!، فأجبرها صاحب الشركة على البقاء بالمكتب بعد إنصراف العاملين؛ حتى وإن بقت لمنتصف الليل لتخلص منها كاملة بهذه الليلة!!.

كانت قواها قربت على النفاذ، فلم تنم منذ أكثر من يومين، وقد أرهقها ذلك التركيز المركز!، وعندما شرف الليل على المجيء كانت لاتزال بالمكتب، ترسم بضعف وتحتسي القهوة.. وتقاوم بإعياء شديد، حتى بدأت الخطوط بالتداخل.. والألوان بالتضارب من حولها!؛ فأغمضت عيونها علها تستعيد بعضًا من تركيزها وعندما فتحتها من جديد وجدته واقفـًا بنفس المكان.. ونفس النظرة، بنفس الإصرار.. ونفس الشوق والرغبة!!..، وراح عطره المثير يعصف بأرجاء المكتب!، لم تعد تفهم ... لم تعد تعي.. أين هي؟!،.. وأي معركة هذه؟!!، أمسكت برأسها... تقاربت الجدار، وتلاشت الألوان، فسقطت على الأرض مغشيًا عليها!.. وما إن شعرت بدفء أنفاسه تتسلل لداخلها.. انتفضت ودفعته بعيداً عنها، فتنهد هو مبتسمًا؛ كمحارب منتصر أنهكه وطيس المعركة!.. وكان قد امتزج عطره المثير بعطورها الدافئة!!، لملمت ما تبقى منها، وتركت رسوماتها وفنجان قهوتها، وهرولت للخارج مسرعة!.

ملئت مغطسها بالماء، وأفرغت به كل عطورها الفواحة، وراحت تعبث كطفلة مشاغبة، حتى إنها أغرقت كل ما حولها بالرغوة الدافئة!!، أنفقت وقتـًا طويلاً لتفرغ من حمامها، وهنا على باب غرفتها تقف بثبات.. لتدخل بخطا مستقيمة.. فلقد قررت الإستسلام له، أخذت تلك الحبوب المنومة واحدة تلو الأخرى، حتى أفرغت العبوة عن بكرة أبيها!!،.. وخلدت لسريرها تنتظره، غرقت بنوم عميق جداً وهادئ للغاية!!.... مر الوقت حتى أزعج عطرها الجيران، وأبلغوا الشرطة فكسروا بابها؛ وكانت هي مستسلمة تمامًا.. وقد فرت كل عطورها هاربة... ولم يبقى بغرفتها سوى عطــر المـــوت!!।

-تمــت-

:

عندي مشكلة في النت،،

مش عارفة أرد على كومنتات ولا أتابع،،

وداخلة من بره البيت،، عشان أنزل البوست!!!

20 يونيو 2011

20- الحشيـش،، خدعـوك فقــالوا،،!

:
:


ده البوست الــــ 20
في حملة التدوين اليومي،،!
الحشيـش،، خدعـوك فقــالوا،،!

عادي جداً دلوقتي،، وشيء لا يدعوني للاستغراب
إن أعرف إن فلان،، بيحشش،، أو حتى فلانة!
ولما بعترض وأقول إنه غلط،، مضر،، حرام
بتكون فيه ردود معلبة جاهزة منها،،،
الحشيش ده كيف الملوك،،
ده الرئيس الراحل السادات كان بيدخنه!
الحشيش مش مضر،،
وضرره من ضرر سيجارته اللي بيتشرب فيها!!
الحشيش ده كيف اجتماعي،،
بيساعد الناس على التكيف والتأقلم!!
ودي ردود على سبيل المثال،، لا الحصر!
الحشيش مش حرام،،،
ده مجرد نبات،، وزيه مثلا زي الروز ماري!

طيب أخي الحشاش أختي الحشاشة،،
أسمحولي أنغص عليكم عيشتكم،، وأقولكم إنكم ساذجين
الحشيش ده مصيبة سودة،، وحلت علينا
معلش،، ياريت بس تفوقوا وشوية،، وتركزوا!!!


فيه نبات اسمه القنب،،
بيتم استخراج منه 3 أنوع مخدرات
يعني اللي يلاقيه هو قصاد مغارة علي بابا والاربعين مدمن
بيستخرج منه،، البانجو والماريجوانا والحشيش
البانجو،، هو نوع من أنواع النبات!
الماريجوانا،، هو الرؤوس والأوراق الجافة!
الحشيش،، هو خلاصة الراتنج (الصمغ) المفرز منه!

نيجي للحشيش،، يا سعاد!
الحشيش بيذوب في دهنيـــات الجسم،، ولا
يذوب في الماء نهائيا،، يعني بيفضل لمدة طويلة ممكن أسبوع
في أنسجة الجسم،، اللي فيها نسبة عالية من الدهنيــات
زي،، الكبد ،، الرئتين،، المخ،، والأجهزة التناسليـة!
يعني نفس واحد بس،، ممكن يفضل نصه في الجسم
لمدة أسبوع،، في الأجهزة الحيوية!!!

الحشيش بيخدع ليه؟؟!
لأنه مش زي باقي المخدرات له أعراض إنسحاب
يعني ممكن لو توقف المدمن الشرب،، ما يهرش
ويتنطط زي ما بنشوف في الأفلام!

لكن،، خلينا نعرف تأثير الحشيش إيه؟
فيه أسطورة ساذجة،، بتقول إن الحشيش مفيد
جدا للراجل في العلاقة الجنسية،، والحقيقة ،،،،
تعاطي الحشيش بسبب تناقص في هرمون الذكورة عند الراجل
اللي هو هرمون التيستوستيرون،، وبيعمل على نقص إنتاج
الحيوانات المنوية الطبيعية الصالحة،، ويزيد من إنتاج
الحيوانات المنوية الغير طبيعية وصالحة!

من بلاوي الحشيش كمان،،،
إنه بيعمل على إضعاف جهاز مناعة المتعاطي!
يعني بيفقد الجسم المناعة على المدى الطويل،، يعني
اللي بيتعاطى حشيش،، هو بأيده بيأثر على جسمه
نفس تأثير الايدز،، لأن الأيدز مشكلته إنه بينقص مناعة الجسم
والحشيش بيفقد الجسم المناعة،، أفـلا لا تعقلون!!!

الحشيش كمان بيأثر على القلب،،
بيزود من سرعة الضربات؟،، وضعف انقباض العضلة
وده بيأدي لحدوث الذبحات الصدرية!!
ده غير عطب القلب،، وفشل القلب الاحتقاني!

الحشيش وبلاويه على النساء،،،
أولا تدخين الحشيش للأنثى،، بيعمل لها اضطراب
في الهرمونات الأنثوية،، وده بيؤدي لعدم إنتظام الدورة الشهرية!
كمان لو حصل تعاطي للحشيش،، أثناء فترة الحمل،،
بيؤدي زيادة احتمالات فقد الجنين،، لدرجة إن نسبة موت الأجنة
في الأنثى اللي بتشرب حشيش،، تعادل أربع مرات مقابل غير متعاطية!
غير إن لو فضل الجنين،، بتتحطم الكروموسومات عنده،، وده بيؤدي
إلى زيادة معدل التشوهات الخلقية بالجنين!!،، ده غير
إن الطفل للأم المتعاطية،، بيكون أقل حجماً وأكثر انفعالاً!

طيب،، بيقولوا الحشيش بيساعد ع التركيز!!
تمام،، تعالوا نعرف تأثير الحشيش إيه،، على المخ والذاكرة،،

- تأثير الحشيش أو الشعور بالنشوة بعد تعاطيه،، بيؤدي إلى
اضطراب في الحالة العقلية،، زي فترات من القلق والإرتباك أو الذهان!

- يضعف ويشوش على الذاكرة،، وبيعمل كمان تبطئ في الاستيعاب
غير إيه بيثير الأرتبارك والانفعال المؤقت!

- التعاطي المزمن،، بيسبب اضطرابات سلوكية وعقلية!

- بيعمل وعلى المدى القصير على تأثيرات مزعجة وغالبا ما تكون
مؤذية على العمل اللإرادي،، والفاعلية الجسدية والبصرية!

- بيضعف تعاطي الحشيش من القدرة،،،
على التناسق الحركي والإدراك الحسي
اللازم لتتبع الأجسام المتحركة،، أو أكتشاف الضوء السريع،،
وطبعا ده بيسبب كوارث على الطريق في القيادة!!
والمصيبة إن عدم الإدراك ده،، بيستمر 8 ساعات،، من بعد
النشوة الفعلية للحشيش،، !!!!!!!!

ده طبعا غير تأثير الحشيش المؤذي على الرئة
بسبب كمية القطران العالية اللي فيه،، وده بيسبب السرطان
غير إن لمس الحشيش نفسه باستمرار،، ممكن يؤدي لسرطان الجلد
ده غير وجود حويصلات فطر التربة،، مترسب في الرئة
لأنها لا تقتل بالحرق،، وبالتالي بتفضل في الرئة،، وبتسبب
أمراض رئوية شديدة،، وصعبة أو مالهاش علاج!

يا ترى بعد ده كله،، لسه كيف الملوك!!
أتقوا الله في صحتكم!،، ده الحشيش أو ما دخل مصر
كان داخل عشان البهايم،، أعزكم الله!!!

:


19 يونيو 2011

19- 8 يوليــو،، ما يحكمشي يا عينيا!!

:
:

ده البوست الــــ 19
في حملة التدوين اليومي،،!
8 يوليــو،، ما يحكمشي يا عينيا!!
دستــورك معاك يا أخويــا!

جاتلي رسالة من يومين،، وقولت يابت تطنشي
النهــاردة بقى،، تحديداً من ساعة
بفتح الإنبوكس في الياهو،، لأقيتها متكررة 19 مرة
بفتح إنبوكس الهوت ميل،، لاقيتها أكتر من 30 مرة
ولا على الفسيبوك،، ولا عشرتاشر مرة!!
لدرجة إني خوفت أعمل كيليك عليها،، لتكون فيرس!
الدعوات كلها،، حشد للنزول يوم 8 يوليو،،،
تحت عنوان،، الدستور أولاً!!

بالنسبة ليا أنا بحب السلطة أولاً،،
ولو مافيش،،ممكن طمطماية وخيراراية
بس والنبي تكون مش متبكترة!

دستور إيه إللي أولاً ده!!!،،
ممكن حد ينده الست إنشراح،، حالاً
واضح إن متلازمة توريت هاتنقح عليا
حاسة إن بلاعة أباحة،، وردح
عايزة تطفــح حالاً في البوست!!
هو إحنا كنا بنلعب عشرة ديمقراطية عـ المشرايب،،
ولما لاقينا إننا هانخسر،، قومنا مفركشين الدور،
ونلعب دور تاني بقى،، ينكن نكسب!
الكلام ده ينفع،، عنــد أم تيتي!!

يوم 19 مارس،، فاكرينه ولا لاء؟؟
يوم ما كلنا أتصورنا جنب الصوباع البمبي
رمز الديمقراطية الهنية،، والمستقبل المشرق
واللي صوباعه مش بمبي،، ما يجيش جنبي!
والكل قال،، هانحترم النتيجة،، عشان إحنا ديمقراطين!
صح يا شعب،، صح يا نخبة،، صح يا معارضة!
وطبعا،، ده لأن الكل كان متوقع النتيجة،، ((لا))
خير بقى،، ولا عشان اللي قالوا لاء
وأنا معاهم،، خدوا الصوباع الذهبي،،!
والنتيجة طلعت نعــــم،، باكتساح،،
إيه هانفركش الدور،، ونقول مش لاعبين؟!
مهو يا تطلعوا رجالة،، وتحترموا كلامكم،،
يا تلبسوا طرح،، وتستتوا في بيتوكم!
ولا هي هاتبقى الغجرية ست جيرانها؟!
لا،، على فكرة الجيش ممكن يقلب في ثانية،،
وبعيد عنكم قلبته وحشة،، لا داخلية ولا أمن دولة!
وكده كده،، تستتوا أحسن بجد،، أصل خلاص
محدش هايثق فيكم تاني،، عشان اللي عملتوه
لأنكم عيال صغيرين،، بترجع في كلامها ومش قده
واللي بيمشي ورا العيال،، ما بيخلاش من،،،،
أيـــوة بالظبط كده،، النبي حارسك وصاينك!

يارب أعرف أكمل البوست باحترام
أعد طيب من واحد لعشرة،، ولا أعمل إيه؟!
هو إحنا خلصنا من ديكتاتور،، ولوكشة كلاب حوليه
عشان يطلعنا لوكشة دكتاتورين،، وكلاب!!!
إيه،،، هو سلي مان طلع عنده حق!
تصدقوا،، فعلا إنتم غير مؤهلين للديمقراطية؟
هي الديمقراطية يا قفص منك له،، معناها إيه؟؟
مش معناها الأغلبية تحكم،، وتحترم حقوق الأقلية!!
يبقى الأقلية اللي قالت لاء،، وأنا معاهم
نحط الجزم في بوقنا ونكتم خالص،، مادمنا فشلنا
في حشد الشارع عشان يعمل اللي عايزينه!
لكن نبقى فشلة وموكوسين،، وصرفنا شيء وشويات
وفي الأخر ما كسبناش،، غير صوباع فوشيا لكل مصوت!

وكمان عايزين،، نعمل فيها بلطجية ونعترض!
أيوة بلطجية،، هو البلطجي ده بيعمل إيه؟؟
مش بيكون عايز يسرق حاجة مش من حقه
تحت تهديد السلاح مثلاً،،،!
أهو اللي أنتم عايزينه،، هو سرقة الدستور
تحت تهديد المظاهرات،، وخراب البلد!

أيه وحشة سرقة الدستور،، طيب أنا مصممة عليها
الشعب اللي صوت بـ 78% لنعــم،، صوت
عشان عايز اللي يحطوا الدستور،، يكون منتخبين بإرادته!
أنتم بقى عايزين،، تسلبوا الشعب حقه المشروع
هو اختار،، هو عايز،، هو حدد،،،، الطريق والطريقة
يبقى الفشلة اللي معرفوش يقنعوا الشعب،،
سوكتم بوكتم،، عشان ديه إرادة الشعب!

ولا دلوقتي،، الشعب طلع بريالة،،
وعايز حد يمسحهاله،، ومش عارف مصلحته!!
عاااااااااااا،، ويارب تفضل عااااااااا للأخر
يا اخي عااااااااااا من هنا للتحرير،،
الشعب هو اللي عمل الثورة،،
الشعب هو اللي قدم شهداء،،
الشعب هو اللي داق الذل والمرار،،
الشعــب هو اللي أولا يا كلاب!!

لموا الناس عشان حاجة تنفع،، مش تخرب
لموا الناس،، عشان داخلية محترمة!
بدل ما خلاص بقى أوفر،، أطلع ظابط
وموتلك مواطن فور فري!
لموا الناس،، حتى عشان أي بتنجان
أهو حتى ينفعهم،، بدل ماهم بياكلوا زلط!
حد فيكم عارف السكر بقى بكام؟!

8 يوليــو،، ما يحكمشي!
لأن الشعب حكم،، وقال إنه عايز سبتمبر أولاً
يبقى اللي نازل يوم 8 يوليــو،،
نازل ثورة ضد الشعب!
وعلى رأي المخفي المخلوع،،
الشعب باقي والأشخاص زائلون!
الشعب باقي،، وإرادته هي الغالبة،، والباقية
اللي الشعب عايزه،، سيف على رقبة أي حـد
الشعب خط أحمر،، وإرادته خط أحمر
والثورة عليه،،، ثورة سودة عليكم!

فكروا بعقولكم،، ده لو عندكم يعني!
اللي نازل ده،، نازل ليـــه؟؟
ضد مين؟؟،، لصالح مين؟
اللي بتعملوه ده،، هو اللي مبارك كان بيعمله
كان بيقول في إنتخابات،، بس أنا اللي أنجح
يا كده يا مش لاعب،،!،، كان فيه إستفتـاء
والشعب اختار،، دلوقتي عشان مش على مزاجكم بقى كخ!
لا كخ أنت منك له،، يا نحنوح،، وأعملوا حاجة تنفعكم،،
أقولكم،، تعالى خدوا عجلة الإنتاج لفة!!

:

18 يونيو 2011

18- مع فتــافيت،، أكيـــد ألذ!!

:
:
ده البوست الــــ 18
في حملة التدوين اليومي،،!
مع فتــافيت،، أكيـــد ألذ!!
وصفة،،، من مطبخي الخـــاص!

المطبخ،،، مـزاج وهواية!
واللي عندها الهواية دي،، ومزاجها رايق
مع قليل من الحنكة،، والنفس الطيب
هاتبقى طباخة بيـــرفكت!

بعشق الطبيخ،، بس بمزاجي
يعني أطبخ،، من غير غصب وأقتدار!
ولو حتى طبق بيض أومليت،، بيكون غير
أي طبق أومليت ممكن تاكلوه في حياتكم!

اللي بياكل من أيدي مرة،، بيعــرف
إن فيه نكهات معينة ترايد مارك في طبخي
القرنفــل،، الحبهــان!،، بعشقــهم
في الأطباق الحـادقة فظـاع،،!
والأطباق الحـلوة ممتازين،،!
وحتى في المشروبات،، مممممممممم
كركديه بالقرنفل،، قهوة بالحبهان!
حليب بالحبهان،، شاي بالقرنفل!
طعم تــاني،، طعم غيــر!

عامة البهارات،، بتخلي الأكل يجنن
القرفة،، الجنزبيل،، الروز ماري،،
الكسبرة،، الكاري،، الكوبيبة الصيني،،
الكركم،، الزعتر،، المستكة،، الغار،،،، إلخ
بتــدي للأكــــل،، مذاق راقي!

عندي ملكة،، مبسوطة إن ربنا عطاها ليـا،،
ونادراً لما أصادف حد،، عنده زيها!!
أنا أي طبق بدوقه لأول مرة،، برجع البيت
أعمله،، من غير ما أسأل عن الوصفـة بتاعته!
لساني حساس جدا للمكونات،، وأيدي مكيال لا يخطأ!

الجمعة،، ده اليوم بتاعي أنا
بعمل فيه الأكل،، أو بالأحرى الغـــدا
ونظرا لأن كل اللي بكتبه اليومين دول
ممنوع من النشر،، لأنه تفريغ نفسي!
قررت أعزمكم،، على اللي طبخته أمبارح!
رز بالخضار،، وفراخ بالكريمة،،!



المقادير تكفي 6 أشخاص
الوقت،، ساعة!

الرز بالخضار:
1 ك رز بسمتي مغسول ومنقوع نص ساعة
بفضل النوع الدهبي،، الهندي!
1/2 ك بسلة متفصصة،، 1/4 ك جزر مقطع
8 فصوص حبهان،، 8 مسامير قرنفل
3 ورقات غار،، معلقة قرفة
ملح ،، زبدة!

الطريقة:
أثناء نقع الرز،،
بنجيب حلة ونسيح فيها مكعب الزبدة أو 3 معالق سمنة
ونحط 5 فصوص الحبهان،، وزيهم قرنفل
1/2 معلقة القرفة،، ورقتين غار
ونقلب لحد ما ريحة التوابل تطلع،، !

نحط البسلة والجزر،، ونقلب كويس أوي!
نغطيها وكل 3 دقايق،، نقلبها تاني!
تتشوح ربع ساعة،، وبعدين نملح البسلة!
ونطفي عليها،، هاتكون مستوية ومحتفظة بشكلها!

نحط ماية سخنة في حلة كبيرة،،عــ النار
ونحط فيها باقي التوابل،، ونسيبها تغلي كويس
وبعدين نصفي الرز،، ونسلقه فيها!
كبيره ربع ساعة،، ونملحه،، وبعدين نصفيه!

نخلط البسلة،، مع الرز كويس جدا
عشان الرز ياخد نكهة التوابل،، وزبدة البسلة!

الفراخ بالكريمة:
6 صدور فيليه (مخلية)،، مكعب زبدة،،
علبة كريمة طبخ،، 1/4 ك لبن حليب،،
2 كوب شوربة فراخ،، معلقة كبيرة نشــا
3 بصلات كبار (أبيض) مقطع حلقات ومتفرطة
1 ليمونة كبيرة،، 1/2 كوب ماء بارد
5 فصوص حبهان،، 8 مسامير قرنفل،،
3 ورقات غار،، ملح حسب الرغبة!

الطريقة:
نقطع الصدور مكعبات،، متوسطة
ونحط حلة عــ النار،، ونسيح فيها الزبدة
ونضيف القرنفل والحبهان وورق الغار
ونقلب كويس،، لحد ما ريحة التوابل تظهر،،
نضيف مكعبات الصدور،، ونقلب كويس
10 دقايق،، هايتغير لون المكعبات ويبقى أبيض
وتقريبا استوت 3/4 تسوية،، نشيل المكعبات من الحلة
ونحطها في طبق على جنب،،!!

وفي نفس الحلة والزبدة،، نحط حلقات البصل
ونقلبها كويس،، لحد ما تتدبل وتكون طريت نوعا ما
وقتها،، نضيف مكعبات الفراخ تاني،، ونقلبهم كويس أوي
3 دقايق،، ونضيف الشوربة ونقلب برضو كويس
ولما تقرب تغلي،، ما تكونش غليت فعلا
نضيف اللبن،، ونقلب تاني كويس أوي،، وبرضـو
قرب ما تيجي تغلي،، نضيف الكريمة،، ونقلب كويس!

نكون في الوقت ده،، دوبنا معلقة النشا في 1/2 كوباية الماية
ونضيفها للمكونات اللي على النار،، مع أستمرار التقليب
ندوق الطعم،، عشان نملح حسب الرغبة!
ويستمر التقليب،، حوالي 5 دقايق،، يكون قوام السائل
تقل شوية،، ويكون في طريقه للغليان،، نعصر الليمونة
ونقلب دقيقتين،، ونطفي النـار!

ملحوظتين:

أولا،، ما ينفعش نملح قبل ما نحط الكريمة
عشان في الغالب الشوربة والكريمة واللبن،، بيخدعوا
وممكن نملح في الأول،، ونتفاجأ إن الملح زاد أوي!

ثانيا،، طول ما الوصفة على النار
تكون النار متوسطة،، والخلطة ما توصلش نهائي للغليان
لأنها لو غليت هاتفـــك من بعضها،،،
والزبدة تبقى على الوش!!!

بس خلصنا طبخ،،، نغــرف بقى الأكل
الرز في طبق والفراخ في طبق،،!
وممكن نقدم معاهم سلطة طماطم،،
أو عيش محمص،، أو سبيــرنج رولز
اللي هايجرب،، مش هاينــدم
وبألف هــنا :) ،،!


: