10 أكتوبر 2011

9 أكتوبر،، وأحداث ماسبيرو!



أفتح التليفزيون على المصرية،،
الأقباط بيضربوا الجيش بالنار،،
والجيش يستنجد بالشرفاء من أبناء الشعب!
الجيـــش،، يتستنجـــد؟؟!!!!!
تنشكوا في ناركم يا أقباط!

أقلب على الجزيرة،،
مدرعات الجيش تدهس الأقباط أمام ماسبيرو!
الأقبــــاط بيتداســـوا؟؟!!!!!!
تنشك في مدرعاتك يا جيش!

أقلب على 25 يناير،،،
المذيعـــة بتصــــوت وتستغيث،، الأمن بيكسر القنـــاة؟؟!!
ليه؟؟ هي كمان مش مرخصة؟؟؟؟
تنشك في تراخيصك يا أمن!

أرجع تاني على قناة المصرية،،
الأجواء بقت خلاص فــلة شمعــة منـــورة!
تنشكي في نواضرك يا مصرية!

أرجع تاني على الجزيرة،،
المذيعة بتاعة 25 يناير لسه بتصوت،، وكمان الحرة اقتحموها!!
أتشك في إيدي إن فتحت التلفزيون تاني!

هم بيقتحموا قناة 25 يناير مع قناة الحرة في نفس اليوم ليه؟؟
يقصدوا يقولوا إن مصر مش حرة ،،
وإن 25 يناير خلاص بــــح؟؟
لا أنا فاهمك يا عدوي،،
وهتـــلاعيني بالقنوات هلاعـــبك!!

قولت أغير وأقرا الأخبار،،
اللواء حسان سويلم:
اطالب بمنع كل المظاهرات من الآن فصاعدا،،،
فلم يعد هناك مظاهرات سلمية،، ويجب التصدي بحزم للتجاوزات،،،
حتى لو لزم الامر اعلان الاحكام العرفية،،،!!
هل هذه نكتة؟؟؟،، إذن فلأضحك
هع هع هع هع هع!!!

 جريدة الفجر:

فرض حظر التجول بوسط المدينة وميدان التحرير والعبسية!!
قشــدة،، واللي أوله حظر أخره أحكام عرفية!

 قناة السي إن إن :

في اتصال هاتفي منذ قليل مع وزيرة الخارجية الأمريكية :
نحذر المجلس العسكري من تفاقم الأوضاع والضغط على الاقليات
ونعرض عليه الحماية والمساعدة بقوات أمريكية
لحماية المناطق الحيوية ودور العبــادة،،!
بس يا ولية إنتِ،،
خليكي في كورسات الرقص!

 الفجر/ تصريح لعصام شرف،،

أخطر ما يهدد أمن الوطن هو العبث بملف الوحدة الوطنية
وإثارة الفتنة بين الأقباط والمسلمين ولن نستسلم تجاه هذه الفتنة!!
ثــــم،،،
خطاب د. عصام شرف:
أستنكر،، وأكد،، وشدد،،، وابتسم!
والنبي شكلك برنس وهاتغرقنا،، وهي أصلا ثورة لوز
وشكلها هاتبقى فتحـــة خيـــر إن شاء الله!!!
لا تراجع ولا استسلام،، بين قوسين
(قرف والأحداث الدامية)!

جريدة الفجر:
قال شهود عيان من سكان العقارات المجاورة لمبنى ماسبيرو ،،
أنهم ابلغوا الشرطة العسكرية عن اشتباههم فى وجود قناصة،
التي ألقت القبض بدورها على من اشتبهت فيهم ممن كانوا موجودين
بغرف الطابقين الرابـــع والخامــــس،،!
أنت تاني،، كبدة وقناصة؟؟!!
صادق يا عيسوي يا أخويا قبل ما تحلف!

وفي النهايــــة
مايكل مسعد وفيفيـــان مجدي،،،

 عنيهم كانت مليانة فرح وتفاؤل،، وطموح
فجأة بقت عين عمالة بتبكي،،
وعين تانية مش شايفة حتى الدموع!

في كلام كتير ممكن أكتبه،،،
لكن بصراحة بعد اللي حصل النهاردة،، من خاف سلم
المهم ربنا يستر على مصــــر،، يـــارب،،!
ويبعد عن نهـــر النيـــل،،
نهـــر العـــاصي!



هناك 12 تعليقًا:

  1. أحلى حاجة قريتها في اليوم الغـــمّ ده

    ردحذف
  2. انا حزينه ومعنديش كلام تانى ممكن أقوله

    ردحذف
  3. اعلام مصري عايز يتولع فيه ...ربنا يينتقم منهم اللي بيهيجو المسلميين البسطاء على المسيحيين

    ردحذف
  4. اللسلام عليكم..

    كلمات ممتازة ومعبرة.. أضم دعائي لدعائك ودعاء ملايين المصريين.

    تقبلي تحياتي..

    ردحذف
  5. اللهم أنى أستودعتك مصر..♥ رجالها و شبابها .♥.

    نساءها و فتياتها .♥. أطفالها و شيوخها .♥.

    اللهم أنى أستودعتك ممتلكاتها و مبانيها و منشآتها .♥.

    اللهم أنى أستودعتك نيلها و اراضيها و خيراتها .♥.

    اللهم أنى أستودعتك أمنها و أمانها و أرزاق اهلها .♥.

    اللهم أنى أستودعتك حدودها و بحورها و جنودها .♥.

    فأحفظهم بحفظك يا من لا تضيع عنده الودائع و أنت خير الحافظين .

    ردحذف
  6. عادي ايه الجديد
    ده اعلامنا ولا هنشتريه

    ردحذف
  7. اللهم ارنا الحق حقا لا حول و لا قوة الا بالله الهم ارأف بمصر و اهلها و كل بلادنا العربية :( :( :((

    ردحذف
  8. ولا تهنوا ولا تحزنوا و أنتم الأعلون ,, خليهم يلعبوا بقذاره زي متفجير كنيسة القديسين ما خلص على اللى العادلي وسيده دهس مخاليق ربنا وحرق قلوب الامهات هيخلص عليهم .. من موقعي هذا أقدر أقول هانت يا معلم العب براحتك اهى حلاوة روح من نفسك

    ردحذف
  9. السلام عليكم
    مش عارف اعلق اقول ايه
    اتشك انا كمان انى قلت حاجة ما انا قلت همتنع عن الكتابة لحد ما نفهم اى حاجة
    بوست قارب الشمول
    دومت بخير

    ردحذف

خلل براحتك من غير انتظار .. فتافيت أصلاً بتحب الخيار